ސަރުކާރުގެ މަސްކުުންފުނި، މިފްކޯއިން މަސްވެރިންނަށް ދޫކުރަންޖެހޭ ފައިސާގެ ތެރެއިން 46 މިލިއަން ރުފިޔާ މިއަދު ދޫކުރުމަށް ހަމަޖެހިފައިވާ ކަމަށް އެ ކުންފުނިން ބުނެފިއެވެ.

މިފްކޯއިން ބުނީ، 80 މިލިއަން ރުފިޔާ އޮޑިވެރިންނަށް ނުދެއްކި ހުރި ކަމަށާއި، އޭގެ ތެރެއިން 46 މިލިއަން ރުފިޔާ މިއަދު ދޫކުރާއިރު، ބާކީ ހުރި ފައިސާ ކްލިއާ ކުރުމުގެ މަސައްކަތް ވެސް އެ ކުންފުންޏާއި މަސްވެރިކަމާއި ކަނޑުގެ ވަސީލަތްތަކާއި ބެހޭ ވުޒާރާއިން ގުޅިގެން ކުރަމުން އަންނަ ކަމަށެވެ.

މަސްކިރާ މިންވަރެއްގެ މައްޗަށް ކްރެޑިޓަށް އަރާވަރު އިތުރުވާނެ ކަން ފާހަގަކުރަމުން މިފްކޯއިން ބުނީ މި ގޮންޖެހުމުން އަރައިގަތުމަށް ސަބްސިޑީ އާއި ނުލައި ކުންފުނި ހިންގާނެ ގޮތެއް 3 އަހަރުގެ ތެރޭގައި ހޯއްދަވައި، ސަބްސިޑީ އާއި ނުލައި ކުންފުނީގެ ހިންގުން ބައްޓަން ކުރައްވާނެ ކަމަށް މަސްވެރިކަމާއި ބެހޭ ވަޒީރު އަހުމަދު ޝިޔާމް ވިދާޅުވި ކަމަށެވެ.

ހަމައެއާއިއެކު، ކަނޑުއޮށްގިރީގައި ހުރި ފެސިލިޓީ ހުޅުމާލެ އަށް ބަދަލު ކުރުމުގެ މަޝްވަރާތައް މަސްވެރިކަމާއި ބެހޭ ވުޒާރާ އާއި އެކު ކުރެވެމުންދާ ކަމަށް މިފްކޯއިން ބުނެއެވެ.