މަތީ ސާނަވީ ނިންމާ އިމްތިހާނު ތަކުގައި ދަރިވަރުން ބައިވެރިވުމަށް ދައްކަން ޖެހޭ ފީ ސަރުކާރުން ދައްކައިދިނުމުގެ އުސޫލަށް ބަދަލުތަކެއް ގެނެސްފިއެވެ.
ތައުލީމާއި ބެހޭ ވުޒާރާއިން މިއަދު ނެރުނު ސާކިއުލާއެއްގައި ވާގޮތުން، ގްރޭޑް 11 ދަރިވަރުން ހަދާ އޭއެސް އިމްތިހާނަށް ސަރުކާރުން މީގެ ކުރިން ފީ ދެއްކުމުގައި ބަލަމުން އައި މިންގަނޑު ކަމަށްވާ 60 މާކްސް ވަނީ 50 މާކްސް އަށް ދަށްކޮށްފައެވެ.
މި ބަދަލާއި އެކު، ގްރޭޑް 11 ގައި ކިޔަވަމުންދާ ދަރިވަރުންގެ ތެރެއިން އޭއެސް ލެވެލް ގެ މާއްދާއެއްގެ މޮޑިއުލަރ ޔުނިޓެއްގައި ނުވަތަ ޔުނިޓްތަކެއްގައި ބައިވެރިވާން އެދޭ ދަރިވަރުންގެ ތެރެއިން، ގްރޭޑް 11 ގެ ފުރަތަމަ ސެމެސްޓަރ ގައި އެ މާއްދާއަކުން ދަށްވެގެން 50 މާކްސް ހާސިލް ކޮށްފައިވާނަމަ، ސަރުކާރުން އެ މާއްދާއަކަށް ފީ ދައްކައިދޭނެއެވެ.
ތައުލީމާއި ބެހޭ ވުޒާރާއިން ބުނީ، މިއީ މަތީ ސާނަވީ ތައުލީމް ހާސިލް ކުރަމުންދާ ދަރިވަރުންގެ ތެރެއިން ވީހާވެސް ގިނަ ދަރިވަރުންނަށް އިމްތިހާނުގައި ބައިވެރިވެވޭނެ ފުރުސަތު ފަހިކޮށްދިނުމަށް ގެނައި ބަދަލެއް ކަަމަށެވެ.
Advertisement
This content is created and paid for by advertisers and does not involve Voice Journalists
