ކުރިއަށް އޮތް އަޟްހާ އީދުގައި މާލޭގައި ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ އަރިހަށް ޢީދު ވެދުމާއި ދިޔުން އޮންނާނެ ކަމަށް ނޭޝަނަލް ސެންޓަރ ފޯ އާޓްސް (އެންސީއޭ) އިން ހާމަކޮށްފިއެވެ.

އެންސީއޭ އިން މިއަދު ބޭއްވި ނޫސްވެރިންގެ ބައްދަލުވުމެއްގައި، އެ ސެންޓަރުން ބުނީ، މިއަހަރު އަޟްހާ އީދު ރާއްޖޭގެ ރަށްރަށުގައި ވެސް ފާހަގަކުރާ ފަދައިން މާލޭގައި ވެސް ފާހަގަކުރުމަށްޓަކައި ޔޫތު މިނިސްޓްރީ އާއި ގުޅިގެން ތަފާތު ގިނަ ހަރަކާތްތަކެއް ކުރިއަށް ގެންދިޔުމަށް ހަމަޖެހިފައިވާ ކަމަށެވެ.

މިގޮތުން އެންސީއޭ އިން ބުނީ އެންމެ ފުރަތަމަ ބޮޑު އީދާއި ގުޅިގެން އެންމެ ފުރަތަމަ ބާއްވާ "އީދު ވެދުމާއި ދިޔުން" މި މަހުގެ 15 ވަނަ ދުވަހުގެ ރޭ އޮންނާނެ ކަމަށެވެ.

އީދު ވެދުމާއި ދިޔުމަކީ  އިހުގެ ކާބަފައިން އެ އިރެއްގައި އެ ރަށެއްގެ ވެރިއަކަށް ހުންނަ ބޭފުޅެއްގެ އަރިހަށް އީދުގެ ކުޅިވަރުތައް ކުރިއަށްގެންދިއުމުގެ ހުއްދައަށް އެދި ދެންނެވުމަށް ދާދިޔުމަށް ކިޔާ ނަމަކަށް ވާއިރު، އެފަދައިން މާލޭގައި، ރައީސް ޑރ.މުޢިއްޒުގެ އަރިހަށް އީދު ވެދުމާއި ދިޔުމަށް ހަމަޖެހިފައިވާކަމަށް އެންސީއޭ އިން ހާމަކުރެއެވެ.

ޔޫތު މިނިސްޓްރީ އާއި އެންސީއޭ ގުޅިގެން މި ހަރަކާތުގެ ފަރިތަކުރުންތައް ކުރަމުން އަންނައިރު، މި ހަރަކާތް ފެށިގެން ދާނީ ރައީސް ޑރ.މުޢިއްޒު ހުންނަވާ ސަރަހައްދުގެ 50 ނުވަަތަ 100 ފޫޓު ދުރުން ކަމަށާއި، މި ހަރަކާތުގައި ލޮންސި އާއި އައްޑަނަ އާއި ހަތްކޮޅު ފަދަ އާލާތްތައް ބޭނުންކުރަން ހަމަޖެހިފައިވާ ކަމަށް ވެސް އެންސީއޭ އިން ބުނެއެވެ.

މި ފަހަރުގެ ބޮޑު އީދުގައި މާލޭގައި ކުރިއަށް ގެންދިޔުމަށް ހަމަޖެހިފައިވާ އެހެން ހަރަކާތްތަކުގެ ތެރޭގައި، އީދު ނަމާދަށް ފަހު ޢީދު ސައި ބޭއްވުމަށް ވަނީ ހަމަޖެހިފައެވެ.

މީގެ އިތުރުން، ކޯނޑި ކެނޑުމާއި ބޮޑު މަސް ދުއްވުމުގެ ހަރަކާތްތަކާއި އެކު، ތަފާތު އެކި ހަރަކާތްތައް ކުރިއަށްދާނެ ކަމަށް އެންސީއޭ އިން ހާމަ ކުރެއެވެ.