ދ.ކުޑަހުވަދޫ ކައުންސިލުގެ ރައީސް އިންތިހާބު ކުރުމަށް ބޭއްވި ބައި އިލެކްޝަން، ވެރިކަން ކުރާ މައި ޕާޓީ ޕީއެންސީގެ ކެނޑިޑޭޓް ޖާދުﷲ ހަމީދު ކާމިޔާބު ކުރައްވައިފިއެވެ.
އިދިކޮޅު މައި ޕާޓީ، އެމްޑީޕީގެ ފަރާތުން ވާދަކުރި ކެނޑިޑޭޓް އަބްދުﷲ ޖަމީލުއާއި ވާދަކުރައްވައި ޖާދުﷲ ހަމީދު އިންތިހާބު ކާމިޔާބުކުރެއްވީ 826 ވޯޓުންނެވެ. އަބްދުﷲ ޖަމީލު އަށް ލިބިލެއްވީ 624 ވޯޓެވެ.
މި ބައި އިލެކްޝަން ގެ އިތުރުން ލ.ގަމު ކައުންސިލްގެ މެމްބަރަކު އިންތިހާބު ކުރުމަށް ބޭއްވި އިންތިހާބާއި، މ.މުލަކު ކައުންސިލްގެ އަންހެން މެމްބަރު އިންތިހާބު ކުރުމަށް ބޭއްވި އިންތިހާބުގެ ވަގުތީ ނަތީޖާ ވަނީ އިލެކްޝަން ކޮމިޝަން (އީސީ) އިން އާއްމުކޮށްފައެވެ.
ނަތީޖާތައް ދައްކާ ގޮތުގައި ލ.ގަމު ކައުންސިލްގެ މެމްބަރުކަމަށް އެމްޑީޕީގެ ކެނޑިޑޭޓް އަފްޞަލް ޖަޢުފަރު އިންތިހާބުވެފައިވާއިރު، މ.މުލަކު ކައުންސިލްގެ އަންހެން މެމްބަރުކަމަށް އިންތިހާބުވެފައިވަނީ އަމިއްލަ ގޮތުން ވާދަކުރެއްވި ކެނޑިޑޭޓް ރީމާ ޙުސައިން (ރީމް) އެވެ.
Advertisement
This content is created and paid for by advertisers and does not involve Voice Journalists
