ދިވެހިންގެ ތެރޭގައި ވެސް މަގުބޫލު މައުތު ވޮޝް ބްރޭންޑެއް ކަމަށްވާ ލިސްޓަރިން ބްރޭންޑްގެ މައުތު ވޮޝް ކޮންމެ ދުވަހަކު ބޭނުންކުރާ ނަމަ، ކެންސަރު ޖެހުމުގެ ފުރުސަތު ބޮޑު ކަމަށް ދިރާސާ އަކުން ދައްކައިފިއެވެ.

މި ދިރާސާ އިން ދައްކާ ގޮތުގައި، ލިސްޓަރިން ބްރޭންޑްގެ 'ކޫލް މިންޓް' މައުތު ވޮޝް ކޮންމެ ދުވަހަކު ބޭނުންކުރާނަމަ، އަނގައިގައި ހުންނަ ދެވައްތަރެެއްގެ ބެކްޓީރިއާގެ އަދަދު އިތުރުވެއެވެ. މިކަމާއި ގުޅިގެން އެސޯފިޖިއަލް ކެންސަރާއި ކޮލޮރެކްޓަލް ކެންސަރަށް މަގުފަހިވާކަމަށް މީގެ ކުރިން ހަދާފައިވާ ދިރާސާ އަކުން ވަނީ ހާމަވެފައެވެ.

މި މައުތު ވޮޝްގެ ސަބަބުން އޯރަލް މައިކްރޯބަޔޮމް ހުންނަން ޖެހޭ މިންވަރަށް ހުރަސް އެޅިގެންދާ ކަަމަށް މި ދިރާސާ އިން ދައްކާއިރު، ލިސްޓަރިން މައުތު ވޮޝް ތިން މަސް ވަންދެން ކޮންމެ ދުވަހަކު ބޭނުންކޮށްފިނަމަ، އަނގައިގެ ތެރޭގައި ހިމެނޭ ދެ ބެކްޓީރިއާ ކަމަށްވާ ފިއުސޯބެކްޓީރިއަމް ނިއުކްލިއޭޓަމް އާއި ސްޓްރެޕްޓޮކޮކަސް އެންޖައިނޯސަސް އުފެދޭ މިންވަރު އިތުރުވެގެން ދެއެވެ. އަދި ލޭގެ ޕްރެޝަރު ދަށްކޮށްދިނުމަށް އެހީތެރިވާ ބެކްޓީރިއާ އެއް ކަމަށްވާ އެކްޓިނޯބެކްޓީރިއާ ގެ މިންވަރު މަދުވާ ކަމަށްވެސް ދިރާސާވެރިންނަށް ވަނީ ފާހަގަކުރެވިފައެވެ.

މި ދިރާސާ ކުރި ބެލްޖިއަމްގެ އެންޓްވަރޕްގައި ހުންނަ އިންސްޓިޓިއުޓް އޮފް ޓްރޮޕިކަލް މެޑިސިންގެ ސައިންސްވެރިން ވަނީ ދިރާސާގައި 59 ފިރިހެނަކު ބައިވެރިކޮށް، އޭގެ ތެރެއިން އެއްބަޔަކަށް 3 މަސް ދުވަސް ވަންދެން ލިސްޓަރިން ބްރޭންޑްގެ މައުތު ވޮޝް ބޭނުންކުރުމަށް އަންގާފައެވެ. މި ނަތީޖާ ސައިންސުވެރިން ނެރެފައިވަނީ ދިރާސާގައި ބައިވެރިވި މީހުންގެ ތެރެއިން، މައުތު ވޮޝް ބޭނުންނުކުރާ މީހުންނާއި މައުތު ވޮޝް ބޭނުންކުރި މީހުންގެ ތަފާތު ބެލުމަށްފަހުއެވެ.

ދިރާސާ އާއި ގުޅޭގޮތުން ވާހަކަފުޅު ދައްކަވަމުން އެ ޔުނިވާސިޓީގެ އެސްޓީއައި ޔުނިޓްގެ ވެރިޔާ، ޕްރޮފެސަރު ކްރިސް ކެނިއޯން ވިދާޅުވީ، ކޮންމެ ދުވަހަކު މައުތު ވޮޝް ބޭނުންކުރުމަކީ ކެންސަރުގެ އިތުރުން، އެހެނިހެން އިންފެކްޝަން ތަކަށް ވެސް މަގުފަހިވެގެންދާނެ ކަމެއް ކަމަށެވެ. އަދި މައުތު ވޮޝް ބޭނުންކުރުން ހުއްޓާލަން ޖެހޭ ކަމަށާއި، މައުތު ވޮޝް ބޭނުންކުރިއަސް، އަލްކަހޯލް އެކުނުލެވޭ ބްރޭންޑްތައް ބޭނުން ކުރުމަށް އޭނާ ނަސޭހަތްތެރިވިއެވެ.

މި ދިރާސާގައި ލިސްޓަރިން ބްރޭންޑްގެ މައުތު ވޮޝް ބޭނުންކޮށްފައިވާތީ، ހަމައެކަނި އޭގެން ކުރާ އަސަރުތައް ފެނުނުނަމަވެސް، މިއީ އަލްކަހޯލް އެކުލެވޭ ހުރިހާ މައުތު ވޮޝް ތަކުން ވެސް ފެންނާނެ ނަތީޖާ ކަމަށް ދިރާސާ ކުރި ޓީމުން ބުނެއެވެ.

ލިސްޓަރިން މައުތު ވޮޝްގައި 20 އިންސައްތަ އަލްކަހޯލް އެކުލެވޭއިރު، މިތަކެތި ގިނަ ދުވަހަށް ބޭނުންކުރާ ނަމަ، ސިއްހީ މާހިރުންގެ ލަފާ ހޯދުމަށް ސައިންސުވެރިން ނަސޭހަތްތެރިވެއެވެ.