ރާއްޖޭގައި އަލަށް އުފަންވާ ކުދިންގެ އާބާދީ ދަށަށް ދިޔުމާއި ގުޅޭގޮތުން ޤައުމީ ފެންވަރުގައި މަޝްވަރާ ކުރަންޖެހޭކަމަށް އިޖުތިމާޢީ އަދި ޢާއިލީ ތަރައްޤީއާ ބެހޭ ވަޒީރު ޑރ.އައިޝަތު ޝިހާމް ވިދާޅުވެއްޖެއެވެ.

ދައުލަތުގެ މީޑިއާ، ޕީއެސްއެމް ގެ ރާއްޖެ މިއަދު ޕްރޮގްރާމްގައި ވާހަކަފުޅު ދައްކަވަމުން ވަޒީރު އައިޝަތު ޝިހާމް ވަނީ ރާއްޖޭގެ އާބާދީއަށް އަންނަމުންދާ ބަދަލުތަކާއި ގުޅިގެން ޤައުމީ ފެންވަރުގައި ވަރަށް އަވަހަށް މަޝްވަރާތަކެއް ކުރަންޖެހޭކަމަށް ވިދާޅުވެފައެވެ.

މިއީ ހަމައެކަނި ރާއްޖެއަށް ކުރިމަތިވެފައިވާ މައްސަލައެއް ނޫންކަން ފާހަގަކުރައްވާ ވަޒީރު ވިދާޅުވީ ދުނިޔޭގެ އެކި ޤައުމުތަކަށް މި މައްސަލަ ކުރިމަތިވެފައިވާކަމަށެވެ. މި މައްސަލައާއި ގުޅިގެން ދުނިޔޭގެ އެހެން ގައުމުތަކުން ފިޔަވަޅު އަޅަމުން އަންނަ ކަމަށާއި، ގައުމުތަކުން އަލަށް އުފަންވާ ކުދިންނަށް އެކި ކަހަލަ ޢިނާޔަތްތައް ދެމުންގެންދާކަމަށް އެކަމަނާ ވިދާޅުވިއެވެ.

Advertisement

ވަޒީރު އައިޝަތު ޝިހާމް ވިދާޅުވީ، ގައުމުތަކުގައި، ވަޒީފާއަށް ދާތަންތަނުގައި ކުދިން ބެލެހެއްޓޭނެ ނިޒާމު ހަރުދަނާ ގޮތެއްގައި ގާއިމު ކުރަމުންދާ ކަމަށާއި، ވަޒީފާއަށް ދާ މައިންބަފައިންގެ ދަރިން ބެލުމުގެ ޒިންމާއަދާކުރެވޭނެ މަގުތައް ފަހިކޮށްދޭން ޖެހޭ ކަމަށެވެ.

އުފަންވާ ކުދިންގެ އާބާދީ ދަށަށް ދިޔުމުގެ މައްސަލައަށް ޙައްލެއް ހޯދުމަށް ލިބިފައިވާ ހަނި ފުރުސަތުގެ ބޭނުން ނުހިފައިފިނަމަ އެއީ ޤައުމީ ތަރައްޤީއަށް އެޅިގެންދާނެ ހުރަހެއްކަން ވަޒީރު ފާހަގަކުރެއްވިއެވެ.

މޯލްޑިވްސް ބިއުރޯ އޮފް ސްޓެޓިސްޓިކްސްއިން ހާކުރި ބޯހިމެނުމުގެ ނަތީޖާ ތަކުން ދައްކާގޮތުގައި 2014 ވަނަ އަހަރު ރާއްޖޭގެ އާބާދީ  338434 ގައި ހުރިއިރު، 2022 ވަނަ އަހަރު މި އަދަދު ވަނީ 382751 އަށް އިތުރުވެފައެވެ.

މި އަދަދުދަކަށް ބަލާއިރު، 8 އަހަރުގެ މުއްދަތުގެ ތެރޭގައި އެވްރެޖްކޮށް އަހަރަކު 5500 ކުދިން ގެ މަގުން ރާއްޖޭގެ އާބާދީއަށް އިތުރުވީ 44317 މީހުންނެވެ.