ސަރުކާރުން ރައްޔިތުންނަށް ވެފައިވާ ވަޢުދުތައް ހަނދާންކޮށްދޭ ފުޅަނދުތައް ދެކިލައްވަނީ ބިނާކުރުވަނިވި ފާޑުކިޔުތަކެއްގެ ގޮތުގައިކަމަށް މަސްވެރިކަމާއި ކަނޑުގެ ވަސީލަތްތަކާއި ބެހޭ ވަޒީރު އަހުމަދު ޝިޔާމް ވިދާޅުވެއްޖެއެވެ.
ވަޒީރު ޝިޔާމް މިފަދައިން ވިދާޅުވީ، އަޟްހާ އީދުގެ ކުޅިވަރުތަކުގެ ތެރެއިން އާއްމުންގެ މަގުބޫލުކަން ހޯދާފައިވާ ހދ.ކުޅުދުއްފުށީގެ މަށިމާލި ޕެރޭޑް އާއި ގުޅޭގޮތުން ލިޔެފައިވާ ހަބަރެއް އެކްސް ގައި ހިއްސާ ކުރައްވަމުންނެވެ.
މިގޮތުން ވަޒީރު ޝިޔާމް ވިދާޅުވީ، ކުޅުދުއްފުށީ މަށިމާލި ޕެރޭޑަކީ ޢީދުގެ އުފާވެރި ޖައްވުން އަބަދުވެސް ގިނަބައެއްގެ ސަމާލުކަންހުއްޓޭ ހަރަކާތެއް ކަމަށާއި، މި ހަރަކާތުގެ ތެރެއިން ސަރުކާރުތަކުގެ ބައެއް ސިޔާސަތަަށް ފާޑުކިޔުމާއި ވަޢުދުތައް ހަނދާންކޮށްދޭ ފުޅަނދުތައް ދެކިލައްވަނީ ބިނާކުރުވަނިވި ފާޑުކިޔުން އަދި މެސެޖުތަކެއްގެ ގޮތުގައި ކަމަށެވެ.
"ކުޅުދުއްފުށީ މަށިމާލި ޕެރޭޑަކީ ޢީދުގެ އުފާވެރި ޖައްވުން އަބަދުވެސް ގިނަބައެއްގެ ސަމާލުކަން ހުއްޓޭ ހަރަކާތެއް. ސަރުކާރުތަކުގެ ބައެއް ސިޔާސަތަައް ފާޑުކިޔުމާއި ވަޢުދުތައް ހަނދާންކޮށްދޭ ފުޅަނދުތައް އަޅުގަނޑު ދެކެނީ ބިނާކުރުވަނިވި ފާޑުކިޔުން އަދި މެސެޖުތަކެއްގެ ގޮތުގައި."
ވަޒީރު ޝިޔާމް ވިދާޅުވިއެވެ.
ކުޅުދުއްފުށި މަށިމާލި ޕެރޭޑް ގެ ތެރެއިން-- ފޮޓޯ: ކުޅުދުއްފުށި ސިޓީ ކައުންސިލް
ކުޅުދުއްފުށި މަށިމާލި ޕެރޭޑަކީ އެދުވަސްވަރެއްގައި ރާއްޖޭގައި ހިނގާ ފާހަގަކޮށްލެވޭ ކަންކަމާއި ސިޔާސީ މަޝްރަހުގައި އެއިރެއްގައި ކުރިއަށްދާ ކަންކަން ހިމެނޭ ގޮތަށް ކުރިއަށް ދާ ހިނގާލުމެކެވެ.
ރާއްޖޭގެ ގިނަ ބައެއްގެ ތަރުހީބު ކޮންމެ އަހަރަކުވެސް މި ހަރަކާތަށް ލިބިގެންދާއިރު، މިފަހަރުގެ މަށިމާލި ޕެރޭޑްގައި ވެސް ކުޅުދުއްފުށި ރައްޔިތުން ވަނީ މިފަދަ ކަންކަމަށް އަލިއަޅުވާލާފައެވެ.
އޭގެ ތެރޭގައި މިޔަރުގެ ހަމަލާތައް އިތުރުވުމާއި، ކަރަންޓު ބިލު އިންތިހާއަށް ބޮޑު ވުން ހިމެނެއެވެ.
ކުޅުދުއްފުށި މަށިމާލި ޕެރޭޑް ގެ ތެރެއިން-- ފޮޓޯ: ކުޅުދުއްފުށި ސިޓީ ކައުންސިލް
މީގެ އިތުރުންވެސް، ކުރީ އަހަރުތަކެކޭ ވެސް އެއްފަދައިން މިއަހަރު ވެސް ސަރުކާރާއި ސިޔާސީ ބައެއް ބޭފުޅުންނާއި ގުޅޭ ގޮތުން މި ޕެރޭޑްގައި ޝުއޫރުތައް ފާޅުކޮށްފައިވާކަން ފާހަގަކޮށްލަން ޖެހެއެވެ.
Advertisement
This content is created and paid for by advertisers and does not involve Voice Journalists
