ރަޝިއާގެ ރައީސް ވްލަޑިމިއާ ޕުޓިން 24 އަހަރަށްފަހު އުތުރު ކޮރެއާ އަށް ވަޑައިގެންފިއެވެ.

މީގެ ކުރިން ޕުޓިން އުތުރު ކޮރެއާ އަށް ވަޑައިގަތީ 2000 ވަނަ އަހަރުގެ ކުރީ ކޮޅު ވެރިކަމާއި ހަވާލުވެވަޑައިގަތުމަށްފަހުއެވެ.

ރޭގެ ވަގުތެއްގައި ޕުޓިން އުތުރު ކޮރެއާ އަށް ވަޑައިގަތުމާއި އެކު، ވަރަށް ހޫނު މަރުހަބާއެއް އެމަނިކުފާނަށް އެގައުމުން ކިޔާފައިވާއިރު، ޕުޓިން އަށް މަރުޙަބާ ދެންނެވުމަށް އެގައުމުގެ ރައީސް ކިމް ޖޮންގް އުން ވެސް ވަޑައިގެންނެވިއެވެ.

Advertisement

ރަޝިއާއިން ބުނީ މިއީ ދެ ގައުމުގެ ދެމެދުގައި އޮތް ގުޅުން އިތުރަށް ބަދަހި ކުރުމަށްޓަކައި ޕުޓިން ކުރައްވާ ދަތުރުފުޅެއް ކަމަށެވެ. އަދި މި ދަތުރުފުޅުގައި ދެ ގައުމުގެ ދެމެދުގައި ސަލާމަތީ ކަންތައްތަކާއި ގުޅޭ އެއްބަސްވުމެއްގައި ސޮއިކުރައްވައި، ދެބޭފުޅުން އެކުގައި ނޫސްވެރިންނަށް މައުލޫމާތު ދެއްވުމަށް ހަމަޖެހިފައިވާ ކަމަށް ވެސް ރަޝިއާގެ މީޑިއާތަކުން ރިޕޯޓް ކުރެއެވެ.

ޕުޓިންގެ އަރިހުގައި، އެގައުމުގެ ޑިފެންސް މިނިސްޓަރު އަންދްރޭ ބެލޫސޯވް އާއި ފޮރިން މިނިސްޓަރު ސަރގޭ ލަވްރޯވް އާއި ބޮޑުވަޒީރުގެ ނައިބު އެލެގްޒެންޑަރ ނޮވާކް ވެސް ބައިވެރިވެވަޑައިގެންނެވިއެވެ.

މިދަތުރުފުޅުގެ ކުރިން ޕުޓިން ވަނީ އުތުރު ކޮރެއާއިން ރަޝިއާ-ޔޫކްރެއިން ހަނގުރާމައަށް ދެމުންގެންދާ އެއްބާރުލުމަށް ތައުރީފް ވެސް ކުރައްވާފައެވެ.

ރަޝިއާއިން ޔޫކްރެއިން އަށް ހަމަލާ ދޭން ފެށިފަހުން ރަޝިއާ އާއި އުތުރު ކޮރެއާގެ ގުޅުން ކުރިއަށް ވުރެ ބަދަހިވެފައިވާއިރު، މިކަމާއި ގުޅިގެން އެމެރިކާއިން ވަނީ ކަންބޮޑުވުން ފާޅުކޮށްފައެވެ.

އުތުރު ކޮރެއާ އަށް ޕުޓިން މިހާރު ކުރައްވަމުން ގެންދަވާ ދަތުރުފުޅު ނިންމަވާލެއްވުމަށްފަހު ވިއެޓްނާމަށް ވަޑައިގެން، ދެގައުމުގެ ވިޔަފާރިއާއި ގުޅޭ ގޮތުން މަޝްވަރާކުރެއްވުމަށް ވެސް ވަނީ ހަމަޖެހިފައެވެ.