ނިއުކްލިއާ ހަތިޔާރު އުފައްދައި، ކުރިއެރުވުމަށް މަޝްހޫރު ދެ ގައުމު ކަމަށްވާ ރަޝިއާ އާއި އުތުރު ކޮރެއާ އިން، އެއްގައުމު އަނެއްގައުމަށް އަސްކަރީ ގޮތުން އެއްބާރުލުން ދިނުމާއި ގުޅޭ އެއްބަސްވުމެއްގައި ސޮއިކޮށްފިއެވެ.

މިއެއްބަސްވުމުގައި ސޮއި ކޮށްފައިމިވަނީ ރަޝިއާގެ ރައީސް ވްލަޑިމިއާ ޕުޓިން އުތުރު ކޮރެއާ އަށް ކުރެއްވި ދަތުރުފުޅުގަައި، އެ ގައުމުގެ ރައީސް ކިމް ޖޮންގް އުން އާއި އެކުއެވެ.

އެއްބަސްވުމާއި ގުޅޭގޮތުން އުތުރު ކޮރެއާގެ ރައީސް ކިމް ވިދާޅުވީ ދެ ގައުމުގެ ދެމެދުގައި ވެވުނު މި އެއްބަސްވުމަކީ އަހަރުތަކަކަށްފަހު ރަޝިއާއިން އޭޝިއާ ގެ ގައުމަކާއި އެކު އެޅި އެންމެ މުހިންމު އެއް ފިޔަވަޅު ކަމަށެވެ.

Advertisement

24 އަހަރު ފަހުން، ޕުޓިން އުތުރު ކޮރެއާ އަށް ކުރެއްވި މިދަތުރުފުޅުގައި އެމަނިކުފާނު ވަނީ ގެ ގައުމުގެ ދެމެދުގައި އޮތް ގުޅުން ކުރިއަށްވުރެ ވަރުގަދަވާނެ ކަމަށާއި، އުތުރު ކޮރެއާގެ އެއްބާރުލުމާއި އެކު ރަޝިއާގައި އަސްކަރީ އަދި ފަންނީ ކަންކަން އިހުނަށް ވިރެ ކުރިއެރުވޭނެ މަގު ފަހިވާނެ ކަމަށް ވިދާޅުވެފައެވެ.

ދެ ގައުމުގެ ވެރިން ގެ ދެމެދުގައި ކުރިއަށްދިޔަ މަޝްވަރާގެ ބައްދަލުވުމަށްފަހު ސޮއި ކުރެވިގެންދިޔަ މި އަސްކަރީ އެއްބަސްވުމާއި ގުޅޭ ގޮތުން ޕުޓިން ވިދާޅުވީ، އެއްބަސްވުމުގެ ދަށުން، ދެ ގައުމުން ކުރެ އެއްވެސް ގައުމަކަށް ހަނގުރާމައިގެ ހާލަތެއް ނުވަތަ ނުރައްކަލުގެ ހާލަތެއް ކުރިމަތި ވެއްޖެ ނަމަ އެހީތެރިކަން ފޯރުކޮށްދޭނެ ކަމަށެވެ.

އުތުރު ކޮރެއާ އަށް ކުރެއްވި ދަތުރުފުޅު ނިންމާލަވެއްވުމަށްފަހު ޕުޓިން ވަނީ ރޭގެ ވަގުތެއްގައި ވިއެޓްނާމަށް ވަޑައިގެންފައެވެ. ވިއެޓްނާމަށް ވަޑައިގެން، ދެގައުމުގެ ވިޔަފާރިއާއި ގުޅޭ ގޮތުން މަޝްވަރާކުރެއްވުމަށް ހަމަޖެހިފައިވާއިރު، ޕުޓިންގެ އަރިހުގައި، އެގައުމުގެ ޑިފެންސް މިނިސްޓަރު އަންދްރޭ ބެލޫސޯވް އާއި ފޮރިން މިނިސްޓަރު ސަރގޭ ލަވްރޯވް އާއި ބޮޑުވަޒީރުގެ ނައިބު އެލެގްޒެންޑަރ ނޮވާކް ވެސް ބައިވެރިވެވަޑައިގަންނަވައެވެ.