މިދިޔަ އަހަރުގެ އޮކްޓޫބަރު މަހުގެ 7 ވަނަ ދުވަހުނެ ފެށިގެން، ހައްދުފަހަނައަޅާފައިވާ އިސްރާއީލުން ޣައްޒާގައި ހިންގަމުންދާ ގަތުލުއާއްމު މަޑު ޖެހުމަކާއި ކައިރިވެފައިވާ ކަމަށާއި، ލުބުނާނުގެ ހިޒްބުﷲ ޖަމާއަތަށް ހަމަލާދިނުމަށް ޔަހޫދީ ފައުޖު ލުބުނާނުގެ އުތުރަށް ފޮނުވުމަށް މަގުފަހި ކުރަމުންދާ ކަމަށް އިސްރާއީލުގެ އަނިޔާވެރިކަން ހައްދުފަހަނަ އަޅާފައިވާ ބޮޑުވަޒީރު ބެންޖަމިން ނަތަންޔާހޫ ބުނެފިއެވެ.
ނަތަންޔާހޫ ލުބުނާނަށް އަރައިގަތުމަށް ތައްޔާރީތައް ވަމުންދާ ކަމަށް ބުނެފައިވަނީ އިސްރާއީލުން ލުބުނާނަށް އަމާޒުކޮށް ހަމަލާދީފިނަމަ، އިސްރާއީލު ސުންނާފަތިވާވަރަށް ހަމަލާދޭނެ ކަމަށް ހިޒްބުﷲ ގެ އިސްވެރިޔާ ހަސަން ނަސްރުﷲ ވިދާޅުވެފައިވާ ދަނޑިވަޅެއްގައެވެ.
އަނިޔާވެރި ނަތަންޔާހޫ ލުބުނާނަށް އަމާޒުކޮށް ހަމަލާދޭން ނިންމި ނަމަވެސް، ޣައްޒާގެ މުސްލިމުންނަށް އަމާޒުކޮށް ޔަހޫދީން ދެމުންދާ ލާއިންސާނީ ހަމަލާތައް ނުހުއްޓާނެ ކަމަށް ވަނީ ބުނެފައެވެ.
ނަތަންޔާހޫ މިފަދައިން އިންޒާރުދީފައިވާއިރު، ދުނިޔޭގެ ގިނަ ގައުމުތަކުން އަންނަނީ ޣައްޒާގެ ގަތުލުއާއްމުގެ އިތުރުން ލުބުނާނުގައި ޔަހޫދީން ކުރިއަށް ގެންދާ އުދުވާންތައް ހުއްޓާލުމަށް ގޮވާލަމުންނެވެ.
ހަމައެއާއިއެކު، އދ ގެ ސެކްރެޓަރީ ޖެނެރަލް އެންޓޯނިއޯ ގުޓަރެސް ވެސް ވަނީ ލުބުނާނަކީ ދެވަނަ ޣައްޒާއަކަށް ހެދުމުގެ ފުރުސަތު ދެވިގެންނުވާނެ ކަމަށާއި، އެންމެ ގޯސް ފިޔަވަޅެއްގެ ސަބަބުން ހިޔާލަށް ވެސް ނުގެނެވޭ ވަރުގެ ހަނގުރާމައެއް ފެށިދާނެ ކަމަށް ވިދާޅުވެފައެވެ.
ހިޒްބުﷲ އާއި ދެކޮޅަށް ހަނގުރާމަކުރަން ހުރިހާ ގޮތަކުން ވެސް ތައްޔާރަށް އޮތް ކަމަށް ނަތަންޔާހޫގެ ސަރުކާރުން ބުނުމާއި ގުޅިގެން މީގެ ކުރިން ހިޒްބުﷲ ގެ އިސްވެރިޔާ ހަސަން ނަސްރުﷲ ވަނީ ލުބުނާނުގައި ހަނގުރާމަ ފަށާނެ ކަމަށް އިންޒާރުދީ، ވާހަކަދެއްކުމުން ބިރު ނުގަންނަކަމަށާއި، ހަނގުރާމައެއް ފަށާނަމަ ހަގީގަތުގައި ބިރުގަންނަންވީ އިސްރާއީލު ކަމަށް ވިދާޅުވެފައެވެ.
ޔަހޫދީ ފައުޖުން ޣައްޒާގައި ގަތުލުއާއްމު ފެށިތާ ކުޑަ ދުވަސްކޮޅެއްގެ ތެރޭގައި ހިޒްބުﷲ އިން އިސްރާއީލަށް އަމާޒުކޮށް ހަމަލާތައް ދޭން ފަށާފައިވާއިރު، ފާއިތުވި ދުވަސްތަކުގައި ހިޒްބުﷲ އިން ވަނީ އިސްރާއީލަށް އަމާޒުކޮށް ވަރުގަދަ ހަމަލާތަކެއް ފޮނުވާލާފައެވެ.
ޣައްޒާގައި ޔަހޫދީ ފައުޖުން ކުރިއަށްގެންދާ ގަތުލުއާއްމު ހުއްޓާލަންދެން އިސްރާއީލަށް ހަމަލާދޭނެ ކަމަށް ހިޒްބުﷲ އިން ބުނެފައިވާއިރު، އެ ޖަމާއަތުން ދާދި ފަހުން ވަނީ އެމީހުންގެ ހަތިޔާރު ތަކުގެ ތެރެއަށް ޒަމާނީ ޓެކްނޮލޮޖީ އެކުލެވޭ ޑްރޯން ތަކެއް ވެސް އިތުރުކޮށްފައެވެ. މާބޮޑު އިންޒާރަކާއި ނުލައި ހަމަލާދޭ މި ޑްރޯންތަކުން ސަލާމަތްވުމަކީ އުނދަގޫ ކަމަކަށް ވާއިރު، މިފަދަ ހަމަލާ އަކުން މި ހަފްތާގެ އާދިއްތަ ދުވަހު ޔަހޫދީ ސިފައިންގެ މީހަކު ވެސް ވަނީ ވަރަށް ބޮޑަށް ޒަހަމްވެފައެވެ.
Advertisement
This content is created and paid for by advertisers and does not involve Voice Journalists
