ކޮންމެ ދައުރެއްގައި ރައްޔިތުންގެ މަޖިލީހުގެ މެންބަރުންގެ އަދަދު އިތުރުވަމުން އަންނަ އިތުރުވުމަށް ހައްލެއް ގެންނަން ރައްޔިތުންގެ މަޖިލީހުގެ މެންބަރުންގެ ހިޔާލު ހޯދަން މަޖިލީހަށް ގަރާރެއް ހުށަހަޅައިފިއެވެ.

މަޖިލީހުގެ މިއަދުގެ ޖަލްސާއަށް މި ގަރާރު ހުށަހެޅުއްވީ، ސަރުކާރު ހިންގާ ޕީއެންސީގެ ޕާލިމަންޓްރީ ގްރޫޕުގެ ސީނިއާ ޑެޕިއުޓީ ލީޑަރު އަދި ބާރަށު ދާއިރާގެ މެންބަރު އިބްރާހިމް ޝުޖާއުއެވެ.

ޝުޖާއުގެ ގަރާރުގައިވަނީ މަޖިލީހަށް މެންބަރުންގެ އަދަދު، 17 ވަނަ ރައްޔިތުންގެ މަޖިލީހުން ފެށިގެން އިތުރުވަމުން އަންނަކަން ފާހަގަކުރައްވައި، އެފަދައިން އިތުރުވަމުން އަންނަނީ، ގާނޫނު އަސާސީގެ 71 އަދި 72 މާއްދާގެ ސަބަބުން ކަމަށް ވިދާޅުވެފައެވެ.

ގާނޫނުއަސާސީގެ 71 ވަނަ މާއްދާގައި ބުނެފައިވަނީ ކޮންމެ އިދާރީ ދާއިރާއެއްގައި ރަޖިސްޓަރީކުރެވިފައިވާ އާބާދީގެ ފުރަތަމަ 5،000 މީހަކަށް ނުވަތަ 5،000 މީހުން ހަމަނުވާ ކޮންމެ އިދާރީ ދާއިރާއަކަށް ދެ މެންބަރުން އިންތިޚާބުކުރަންވާނެ ކަމަށެވެ.

އަދި، އިދާރީ ދާއިރާއެއްގައި ރަޖިސްޓަރީކުރެވިފައިވާ އާބާދީ 5،000 އަށްވުރެ އިތުރުވާނަމަ، އާބާދީގެ ފުރަތަމަ 5،000 މީހުންނަށްވުރެ އިތުރުވާ ކޮންމެ 5،000 މީހަކަށް މެންބަރެއް ހުންނަންވާނެ ކަމަށެވެ.

ޝުޖާއުގެ ގަރާރުގައި ވަނީ މަޖިލީހުގެ މެންބަރުންގެ އަދަދު، ދުނިޔޭގެ އެހެން ގައުމުތަކާ އަޅައިބަލާއިރު ވެސް ރާއްޖޭގެ އާބާދީގެ ނިސްބަތުން އިތުރުވަމުން ކަން ފާހަގަކުރައްވާފައެވެ. 

އެގޮތުން، މަޖިލީހަށް 2009 ގައި 77 މެންބަރުން އިންތިޚާބު ކޮށްފައިވާއިރު، 2014 ގައި އެ އަދަދު 85 އަށް އިތުރުވެ، މިދިޔަ 19 ވަނަ މަޖިލީހުގައި 87 މެންބަރުން ތިއްބެވިއެވެ. އެފަހުން މި ހިނގާ މަޖިލީހުގައި 93 މެންބަރުން އެ ތިއްބެވެ. 

އެހެން ކަމުން، މި މައްސަލައަށް މަޖިލީހުން ހައްލެއް ގެންނަންޖެހޭ ކަމަށް ޝުޖާއު ހުށަހެޅުއްވި ގަރާރުގައިވެއެވެ.

އެ ގަރާރުގައި ޝުޖާއު އިތުރަށް ވިދާޅުވީ، މެންބަރުންގެ އަދަދު ހިފެހެއްޓުމާ ގުޅޭ ގޮތުން މީގެ ކުރިން ވެސް ތަފާތު އިސްލާހުތަކެއް ހުށަހެޅުނު ކަމަށާއި އެކަމަކު މަޖިލީހުގެ ޖުމުލަ މެންބަރުންގެ ތާއީދު އެ އިސްލާހުތަކަށް ލިބިފައިނުވާ ކަމަށާ އެހެން ކަމުން، މަޖިލީހުގެ ގަވާއިދު ތަންދޭ އެންމެ ފުޅާ މިނެއްގައި މި ގަރާރަށް ބަހުސްކޮށް، މެންބަރުންގެ ހިޔާލު ފާޅުކުރަން އެ ގަރާރުގައި ވަނީ އެދުވަޑައިގެންފައެވެ.