އެމެރިކާގެ އަސްކަރިއްޔާގެ ސިއްރު މައުލޫމާތުތަކެއް ލީކް ކޮށްލި މަޝްހޫރު ވިކިލީކްސްގެ ބާނީ ޖޫލިއަން އަސާންޖް މިނިވަންވެއްޖެއެވެ.

އުމުރުން 52 އަހަރުގެ އަސާންޖްގެ މައްޗަށް އެމެރިކާގެ ޖާސޫސީ ޤާނޫނާއި ޚިލާފުވިކަން ސާބިތުވެ، އިނގިރޭސިވިލާތުގެ ބެލްމާރޝް ޖަލުގައި ހުރުމަށްފަހު މިނިވަންވެފައިވަނީ ޕެސިފިކްގައި އޮންނަ ރަށެއް ކަމަށްވާ ނޮދަން މެރިއާނާ އައިލެންޑްސްގެ ކޯޓަށް ހާޒިރުވެ އެމެރިކާ ސަރުކާރާއިއެކު ހެދި އިއުތިރާފުގެ އެއްބަސްވުން ގަބޫލުކުރުމާއި ގުޅިގެންނެވެ.

މިއާއިއެކު އަސާންޖް ވަނީ އޭނާގެ އުފަން ގައުމު ކަމަށްވާ އޮސްޓްރޭލިއާ އަށް ދިއުމަށް ދަތުރު ފަށާފައެވެ.

2006 ވަނަ އަހަރު އަސާންޖް އުފެއްދި ވިކިލީކްސް މެދުވެރިކޮށް އޭނާ ވަނީ އެމެރިކާގެ ޑިފެންސް ޑިޕާޓްމަންޓުގެ ކޮމްޕިއުޓަރ ޕާސްވޯޑް ލީކްކޮށްލުމުގެ އިތުރުން، އެމެރިކާގެ އަސްކަރިއްޔާއިން އިރާގާއި އަފްޣާނިސްތާނުގައި ތިބި އެމެރިކާ ސިފައިންނަށް ޖާސޫސުކޮށްދޭ މީހުންގެ ނަންތައް ވެސް ހާމަކޮށްފައެވެ.

ހަމައެއާއިއެކު، 2007 ވަނަ އަހަރު ބަޣްދާދުގައި އެމެރިކާ ސިފައިން ދިން ހެލިކޮޕްޓަރުގެ ހަމަލާއެއްގައި ރޮއިޓާސްގެ ދެ ނޫސްވެރިން ހިމެނޭ ގޮތަށް 11 މީހުން މަރުވި ހާދިސާ ގެ ވީޑިއޯ ވެސް އަސާންޖް ލީކް ކޮށްލިއެވެ.

މި މައްސަލައާއި ގުޅިގެން އެމެރިކާ ސަރުކާރުން ކުރިމަތި ކުރުވި ހުރަސްތަކުގެ ސަބަބުން 7 އަހަރު ވަންދެން ލަންޑަނުގައި ހުންނަ އިކުއެޑޯ އެމްބަސީގެ ހިމާޔަތް ހޯދިއިރު، ހައްޔަރުކޮށް މިނިވަންވުމާއި ހަމައަށް އަސާންޖް 5 އަހަރަށް ވުރެ ގިނަ ދުވަސް ބެލްމާރޝް ޖަލުގައި ހޭދަކުރިއެވެ.

އަސާންޖް މިނިވަންވުމާއި ގުޅިގެން ވިކިލީކްސް އިން އެކްސްގައި ނެރުނު ބަޔާނެއްގައި ބުނީ، ކުޑަ ކުޑަ ޖަލު ގޮޅިއެއްގައި 1901 ދުވަސް ހޭދަކުރުމަށްފަހު އަސާންޖް މިނިވަންވެފައިވާ ކަމަށާއި، ވަރަށް އަވަހަށް އޭނާގެ އަންހެނުން ސްޓެލާ އަސަންޖް، އަދި އެމީހުންގެ ދަރިންނާއި ބައްދަލުވާނެ ކަމަށެވެ.