ކުރީގެ ރައީސް އިބްރާހިމް މުޙައްމަދު ޞާލިހުގެ ވެރިކަމުގައި މަސްވެރިން ކިރާ މަހުގެ އަގު ބޮޑު ކުރީ، އާ ދައުރަކަށް އިންތިހާބުވެވަޑައިގެންފިނަމަ ރާއްޖެއިން  ޔޫރަޕާއި އިނގިރޭސިވިލާތަށް ބޭރުކުރާ މަހުން ނަގާ ޑިއުޓީ ކަނޑާލާގޮތަށް ބިނާކޮށްފައިކަމަށް އެމަނިކުފާނު ވިދާޅުވެއްޖެއެވެ.

ރާއްޖެ ޓީވީގެ "ފަށާއިރު" ޕްރޮގްރާމްގައި ވާހަކަފުޅުދައްކަވަމުން ރައީސް ޞާލިހު ވިދާޅުވީ، ސަރުކާރުން މަސްވެރިކަމަށް އިންވެސްޓު ނުކޮށް، އެސިނާއަތް ދޫކޮށްލާފައި އޮތް ނަމަވެސް މަސްދޯނިތަކާއި މަސްވެރިން ބޭނުންކުރާ އާލާތްތައް ތަރައްގީވެގެން އައިސްފައިވާ ކަމަށެވެ.

ރައީސް ޞާލިހު ވިދާޅުވިގޮތުގައި، މަސްވެރިން ބާނާ މަހަށް ފައިސާ ނުދެވުނު މައިގަނޑު ސަބަބަކީ މަސްވެރިންނާއި މަސްދޯނިތަކުން ތަރައްގީވެފައިވާ މިންވަރަށް ސަރުކާރުން ފައިހަމަކޮށްފައި ނުވުމެވެ.

Advertisement

އެމްޑީޕީގެ ވެރިކަމުގައި މަސްވެރިކަމުގެ ސިނާއަތް ފުޅާކުރުމަށް މަސައްކުރެއްވިކަން ފާހަގަކުރައްވަމުން، ރައީސް ޞާލިހު ވިދާޅުވީ، މަސްވެރިކަން އިތުރަށް ތަރައްގީކުރެވޭނެ ގޮތްތަކަށް ނިމިދިޔަ ސަރުކާރުގެ ސިޔާސަތުތައް ބައްޓަން ކުރި ކަމަށާއި، އޭގެ ތެރޭގައި  ފެލިވަރުގެ ފެކްޓްރީ ބޮޑުކުރުމާއި، ފެލިވަރު، އައްޑޫ، އިހަވަންދޫ ފަދަ ތަންތަނުގެ ސްޓޯރޭޖް ގާއިމްކުރުމާއި ބޮޑުކުރުމުގެ މަސައްކަތަށް ހާއްސަ ސަމާލުކަމެއް ދެއްވި ކަމަށެވެ.

ރައީސް ޞާލިހު ވިދާޅުވީ، ރާއްޖެއިން މައިގަނޑު ގޮތެއްގައި ބޭރުކުރަނީ ރޯ މަސް ކަމަށާއި، ތައިލެންޑަށް އެތަކެތި ގެންގޮސް އެގައުމުން އެ މަސް ޕްރޮސެސް ކުރުމަށްފަހު ޔޫރަޕުގެ ބާޒާރަށް ބޮޑު އަގުގައި އެކްސްޕޯޓް ކުރާ ކަމަށެވެ. ކުރީ ސަރުކާރުން މަސް ޕްރޮސެސް ކުރުމުގެ މަސައްކަތް ފެށީ، މަހަށް ހަމަ އަގެއް ހޯދައިދެވޭނީ ރާއްޖޭގައި މަސް ޕްރޮސެސިންގެ މަސައްކަތް އިތުރުކޮށްގެންކަމަށްވާތީ ކަމަށް ވެސް ރައީސް ޞާލިހު ވިދާޅުވިއެވެ.

މި ޕްރޮގްރާމްގައި ވާހަކަފުޅު ދައްކަވަމުން ރައީސް ޞާލިހު ވަނީ  ޑިއުޓީ ކުޑަކުރުމުގެ މަސައްކަތް މި ސަރުކާރަށް ނުކުރެވެނީ އެކަށީގެންވާ ގޮތަކަށް ޔޫރަޕާއި އިނގިރޭސިވިލާތާއެކު މަޝްވަރާ ކުރެވެމުން ނުދާތީ ކަމަށް ވިދާޅުވެފައެވެ.

ރިޔާސީ އިންތިހާބާއި ދިމާކޮށް ރައީސް ޞާލިހު މަހުގެ އަގު 25 ރުފިޔާއަށް ބޮޑުކުރެއްވުމުގެ ސަބަބުން މިފްކޯއަށް ސަބްސިޑީގެ ގޮތުގައި ދިނުމަށް ނިމުނު އަހަރު ބަޖެޓަށް ވުރެ އިތުރަށް ގާތްގަނޑަކަށް 250 މިލިއަން ރުފިޔާ ދައުލަތުން ހަރަދުކުރަންޖެހުނު ކަމަށް އޮޑިޓް ރިޕޯޓުން ހާމަކުރެއެވެ.

ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވެރިކަމަށް ވަޑައިގެންނެވިއިރު، ކުރީ ސަރުކާރުން މަސްވެރިންނަށް 200 އެތައް މިލިއަން ރުފިޔާއެއް ދޭން ހުރި ކަމަށް މަސްވެރިކަމާއި ކަނޑުގެ ވަސީލަތްތަކާއިބެހޭ ވުޒާރާގެ ވަޒީރު އަހުމަދު ޝިޔާމް މީގެ ކުރިން ވަނީ ވިދާޅުވިއިރު، ދާދި ފަހުން، ޕީއެންސީގެ ޖަގަހަ ހުޅުވުމަށް ރޭ ބޭއްވި ޖަލްސާގައި ވާހަކަފުޅު ދައްކަވަމުން ވަޒީރު ޝިޔާމް ވަނީ މި ސަރުކާރު ވެރިކަމާއި ހަވާލުވީއްސުރެ، މިހާ ހިސާބަށް މަސްވެރިންނަށް ޖުމްލަ 933 މިލިއަން ރުފިޔާ ދޫކޮށްފައިވާނެކަމަށް ވިދާޅުވެފައެވެ.