ފުލުހުން ތަހުގީގު ކުރަމުންދާ މައްސަލަ އަކާ ގުޅިގެން ހައްޔަރު ކުރި އެންވަޔަރަމަންޓު މިނިސްޓްރީގެ ސްޓޭޓް މިނިސްޓަރު ފާތިމަތު ޝަމްނާޒް އަލީ ސަލީމް އެ މަގާމުން ވަކިކޮށްފިއެވެ. 

އެންވަޔަރަމަންޓު މިނިސްޓްރީގެ ވެބްސައިޓްގައިވާ ގޮތުން އިއްޔެ ޝަމްނާޒް މަގާމުން ވަކިކޮށްފައިވާއިރު، ފުލުހުން ތަހުގީގު ކުރަމުންދާ މައްސަލަ އަކާ ގުޅިގެން ޝަމްނާޒް އާއި އިތުރު ދެ މީހަކު ޖޫން 23 ވަނަ ދުވަހު ހައްޔަރު ކޮށްފައިވާ ކަމަށާއި، އެ މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރު ކުރުމުން، 7 ދުވަހަށް ބަންދު ކުރުމަށް އަމުރު ކޮށްފައިވާ ކަމަށް ފުލުހުން ވަނީ ބުނެފައެވެ.

މައުލޫމާތު ލިބިފައިވާ ގޮތުގައި ޝަމްނާޒްގެ މައްޗަށް ކުރަނީ ދައުލަތުގެ އިސްވެރިއަކަށް ސިހުރު ހެދިކަމުގެ ތުހުމަތެވެ.

Advertisement

ޝަމްނާޒް އަކީ ރައީސުލްޖުމްހޫރިއްޔާ އޮފީހުގެ މިނިސްޓަރ އާދަމް ރަމީޒްގެ ކުރީގެ އަނބިކަނބަލުންނެވެ. ޝަމްނާޒް އެމަގާމަށް އައައްޔަނު ކުރެވުނު އިރު ދެކަނބަލުން ކައިވެނި ކޮށްގެން ތިބި ނަމަވެސް، ދެކަނބަލުންގެ ކައިވެނި ވަނީ މިދިޔަ ޖޫން މަހު ރޫޅިފައެވެ.

މާލޭ ސިޓީ ކައުންސިލްގެ މެންބަރު ކަން ވެސް ކުރެއްވި ޝަމްނާޒް, ނޮވެމްބަރ މަހުގެ 19 ވަނަ ދުވަހު އިސްތިއުފާ ދެއްވުމުން، މުލިއާގޭގެ އިސްވެރިޔާގެ މަގާމު އޭނާއަށް ދީފައިވާއިރު، އެންވަޔަރަމަންޓު މިނިސްޓްރީގެ ސްޓޭޓް މިނިސްޓަރު ކަމަށް އައްޔަނު ކުރީ މިއަހަރުގެ އޭޕްރިލް މަހުގެ 4 ވަނަ ދުވަހުއެވެ.