މެނިންގޯކޮކަލް ބަލީގެ ކޭސް އެއް ރާއްޖެއިން ފެނުމާއިއެކު، ކޮންޓެކްޓް ޓްރޭސިންގެ މަސައްކަތް ފެށުނު ކަމަށާއި، އެ މަސައްކަތުގެ ތެރެއިން މިހާތަނަށް 46 ކޮންޓެކްޓެއް ފާހަގަކުރެވިފައިވާ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނެފިއެވެ.

ދައުލަތުގެ މީޑިއާ، ޕީއެސްއެމްގެ "ރާއްޖެ މިއަދު" ޕްރޮގްރާމްގައި ވާހަކަފުޅު ދައްކަވަމުން އެޗްޕީއޭގެ ޑެޕިއުޓީ ޑިރެކްޓަރ ޖެނެރަލް އޮފް ޕަބްލިކް ހެލްތު އިބްރާހިމް އަޝްރަފް ވިދާޅުވީ މިހާތަނަށް ފާހަގަކުރެވުނު 46 ކޮންޓެކްޓަކަށް ބަލިން ރައްކާތެރިވުމަށްދޭ ޕްރޮފައިލެކްޓިކް ބޭސް ދޭން ޖެހޭ ފަރާތްތަކަށް ދީފައިވާ ކަމަށެވެ.

ހަމައެއާއިއެކު، އަދިވެސް ކޮންޓެކްޓް ޓްރޭސިންގެ މަސައްކަތް ކުރިއަށްދާ ކަމަށް އަޝްރަފް ވިދާޅުވިއެވެ.

މިއީ ރާއްޖެއިން ނުފެންނަ ބައްޔެއް ނަމަވެސް، އިންވޭސިވް މެނިންގޯކޮކަލް ފެނިފައިވަނީ، މަޝްހޫރު ފުޓުބޯޅަކުޅުންތެރިޔާ މުޙައްމަދު ޢާރިފު (ބަކާ) ގެ ގައިންނެވެ. ބަކާ ވަނީ، ޙައްޖުގެ މާތް އަޅުކަން އަދާ ކުރުމަށްފަހު އެނބުރި އައިފަހުން، ކުއްލިއަކަށް، ޙާލު ދެރަވެ، އައިސީޔޫގައި ފަރުވާ ދެމުން ދަނިކޮށް މިދިޔަ އަންގާރަ ދުވަހުގެ ވަގުތެއްގައި ނިޔާވެފައެވެ.

އެކަމާއި ގުޅިގެން ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ވަނީ ބަކާ އާއި ކޮންޓެކްޓްވި މީހުންގެ ކޮންޓެކްޓް ޓްރޭސިންގް ހަދާ، ކޮންޓެކްޓްވީ ފަރާތްތަކަށް މައުލޫމާތު ދީ، ބަލިން ރައްކާތެރިވުމަށްދޭ ޕްރޮފައިލެކްޓިކް ބޭސް ދޭން ފަށާފައިއެވެ.

މިކަމާއި ގުޅިގެން ސިއްހީ ވުޒާރާއިން ބުނީ، މެނިންގޮކޯކޮލް ބަލި ރާއްޖޭގައި މިހާތަނަށް ނުފެތުރޭ ކަމަށާއި، ސިއްހީ ދާއިރާގައި މަސައްކަތްކުރާ ފަރާތްތަކާއި އާއްމުން މި ބަލީގެ ވެކްސިން ޖަހަން ޖެހޭ ފަދަ ހާލަތެއް ކުރިމަތިވެފައިނުވާ ކަމަށެވެ.

އެހެންނަމަވެސް، އެ ވުޒާރާއިން ވަނީ ހައްޖާއި އުމްރާ ދާ މީހުންނާއި މެނިންގޮކޯކޮލް ބަލި ފެތުރޭ ގައުމުތަކަށް ދަތުރުކުރާ މީހުންގެ އިތުރުން ވަކި ހާއްސަ ހާލަތެއް ކުރިމަތިވެފައިވާ މީހުން މި ވެކްސިން ފުރިހަމަ ކުރުމަށް އިލްތިމާސްކޮށްފައެވެ.

ގައިން ގަޔަށް އަރާ، އިންވޭސިވް މެނިންގޯކޮކަލް އަކީ ބެކްޓީރިއާއެއްގެ ސަބަބުން ޖެހޭ ސީރިއަސް އިންފެކްޝަނެކެވެ. މި ބަލީގެ ސަބަބުން، ގުނަވަންތައް ފެއިލްވުމަށް މަގު ފަހި ވާއިރު، މައިބަދައާއި ސިކުނޑިއަށް ވެސް ގެއްލުންވެއެވެ.