ހުކުރު ދުވަހު ފެށި އީރާނުގެ ރިޔާސީ އިންތިހާބު ވޯޓުލުން 18 ގަޑިއިރަށްފަހު ރަސްމީކޮށް ބަންދުކޮށް ވޯޓް ގުނަންފަށައިފިއެވެ.

އީރާނުގެ އިންތިހާބުގެ މައި މަރުކަޒުގެ ތަރުޖަމާނު މުހައްމަދު އިސްލާމީ ވިދާޅުވީ ވޯޓް ފޮށިތައް ބަންދުކޮށްފައިވަނީ ރޭގެ ދަންވަރުގެ ވަގުތެއްގައި ކަމަށެވެ.

ހުކުރު ދުވަހުގެ ހެނދުނު 8 ޖެހިއިރު ފެށި މި އިންތިހާބުގެ ވޯޓްލުން އެދުވަހުގެ އިރުއޮއްސި 6 ޖަހާއިރު ނިންމާލާގޮތަށް ހަމަޖެހިފައިވީ ނަމަވެސް، އިންތިހާބު ސުޕަވައިޒް ކުރާ އިންޓީރިއާ މިނިސްޓްރީން ވަނީ ގިނަ ބަޔަކަށް ވޯޓުލުމުގެ ފުރުސަތު ފަހިކޮށްދިނުމުގެ ގޮތުން ވޯޓްލާ ވަގުތު ތިން ފަހަރަށް އިތުރުކޮށްފައެވެ.

ދަތުރުކުރެއްވި ހެލިކޮޕްޓަރު ވެއްޓި މިިދިޔަ މަހު ހިނގި ހާދިސާއެއްގައި އީރާނުގެ ރައީސް ކަމުގައި ހުންނެވި އިބްރާހިމް ރައިސީ  އަވަހާރަވުމާއި ގުޅިގެން އައު ރައީސަކު ހޮވުމަށް ބާއްވާ މި އިންތިހާބުގައި ވާދަކުރަނީ އެގައުމުގެ ކުރީގެ ނިއުކްލިއާ ނެގޯޝިއޭޓަރު ސައީދު ޖަލީލީ އާއި އީރާނުގެ މަޖިލީހުގެ ރައީސް މުހައްމަދު ބަޣްރު ޤާލިބާފް ގެ އިތުރުން މަސްއޫދު ޕެޒެޝްކިއަން އެވެ.

އީރާނުގައި 64 މިލިއަން މީހުންނަށް ވޯޓުލުމުގެ ހައްގު ލިބިގެންވާއިރު، ލަފާކުރެވޭ ގޮތުގައި އޭގެ ތެރެއިން ގިނަ މީހުންނަކީ ޒުވާނުންނެވެ. މި އިންތިހާބުގައި ވޯޓްލުމަށް އީރާނުގެ އެކި ސަރަހައްދުތަކުގައި ޖުމްލަ 58،640 ވޯޓު ފޮށި ބަހައްޓާފައިވާއިރު އޭގެ ތެރެއިން 6،000 އަށް ވުރެ ގިނަ ވޯޓު ފޮށި ހުރީ ީރާނުގެ ވެރިރަށް، ތެހެރާންގަ އެވެ. އޭގެ އިތުރުންވެސް، އެގައުމުން ބޭރުގައި ވެސް 344 ވޯޓުލާ މަރުކަޒެއް ވަނީ ކަނޑައަޅާފައެވެ.

އެންމެ ފަހުން 2021 ވަނަ އަހަރު ބޭއްވި ރިޔާސީ އިންތިހާބަށްވުރެ މިއަހަރު ތެހެރާނާއި އެގައުމުގެ އެހެން ސިޓީތަކުގެ ވޯޓުލާ މަރުކަޒުތަކުގެ ކުރިމަތީގައި ވޯޓުލާ މީހުން ދިގު ކިޔޫތަކެއް ހަދާފައިވާތީ ވޯޓްލާ މީހުންގެ އަދަދު އިތުރުވާނެ ކަމަށް ބެލެވެއެވެ.

އީރާނުގެ ރިޔާސީ އިންތިހާބާއި ބެހޭ އޮފިޝަލުން ބުނި ގޮތުގައި ވޯޓް ފޮށިތައް ބަންދުކުރުމާއި އެކު، ވަގުތުން ވޯޓްތައް ގުނަން ފަށާފައިވާއިރު، އިންތިހާބުގެ ނަތީޖާ އިއުލާނު ކުރާނީ މިއަދުގެ މެންދުރުގެ ވަގުތެއްގައި އެވެ.