މާލެ ސަރަހައްދުގައި ޙައްޖުވެރިންނަށް ޚާއްސަ ފްލޫ ކްލިނިކްތަކެއް ގާއިމުކޮށްފިއެވެ.

ޙައްޖުގެ އަޅުކަމަށްފަހު ޙައްޖުވެރިން ރާއްޖެ އަންނަ ދުވަސްވަރާއި ދިމާކޮށް، ހުޅުމާލެއާ ވިލިމާލޭގެ އިތުރުން މާލޭގެ އައިޖީއެމްއެޗް ހޮސްޕިޓަލުގައިވެސް ހައްޖުވެރިންނަށް ޚާއްސަ ފުލޫ ކްލިނިކް ހުޅުވާފައިވާއިރު، މިކަމާއި ގުޅޭ ގޮތުން ސިއްހީ ވުޒާރާއިން ބުނީ، މިފަދަ ކްލިނިކްތައް ގާއިމުކުރަނީ އާއްމު ސިއްޙަތު ރައްކާތެރިކުރުމުގެ ގޮތުން ކަމަށެވެ.

ފުލޫ ކްލިނިކްތަކުގެ މަޤްސަދަކީ މިދުވަސްވަރު ފެތުރެމުންދާ ހުމާއި ރޯގާގެ ޢަލާމާތްތައް ހުންނަ މީހުންނަށް ފަސޭހައިން ރައްކާތެރިކަމާއެކު ފަރުވާ ލިބޭނެ އިންތިޒާމުތައް ހަމަޖައްސައި، އާއްމުންގެ ތެރޭގައި ބަލި ފެތުރުން ކޮންޓްރޯލްކުރުމަށް ކަމަށް އެވުޒާރާއިން ފާހަގަކުރެއެވެ. 

ބަލި ފެތުރޭ މިންވަރު އިތުރުވާނަމަ، މާލެ ސަރަހައްދުގެ އިތުރުން، އެހެނިހެން ހިސާބުތަކުގައި ވެސް ފްލޫ ކްލިނިކް ގާއިމު ކުރާނެ ކަމަށް އެވުޒާރާއިން މައުލޫމާތުދެއެވެ.

އެހެންކަމުން، ޙައްޖުން އަންނަ ފަރާތްތަކުގެ ކިބައިން ހުމާއި ރޯގާގެ އެއްވެސް އަލާމާތެއް ފެންނަ ނަމަ، އެކަމަށް މި ކްލިނިކްތަކުން ޚިދުމަތް ހޯދުމަށް ސިއްހީ ވުޒާރާއިން އިލްތިމާސް ކުރެއެވެ.