ސަރުކާރުގެ މަސްކުންފުނި، މިފްކޯއިން މަސް ގަންނަ އަގަށް ގެނައި ބަދަލާއިއެކު، މަސްވެރިން ބާނާ މަހަށް 2 ހަފްތާ ތެރޭގައި ފައިސާ ދިނުމަކީ އަމާޒެއް ކަމަށް މަސްވެރިކަމާއި ކަނޑުގެ ވަސީލަތްތަކާއި ބެހޭ ވަޒީރު އަހުމަދު ޝިޔާމް ވިދާޅުވެއްޖެއެވެ.
މިފްކޯއަށް މަސް ގަންނަ އަގަށް ގެނެސްފައިވާ ބަދަލާއި ގުޅޭގޮތުން ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ވަޒީރު ޝިޔާމް ވިދާޅުވީ، މަސްވެރިން މަސް ކިރާތާ 48 ގަޑިއިރުތެރޭގައި މަސްވެރިންނަށް ފައިސާ ދޫކުރުމަކީ ސަރުކާރުގެ އަމާޒެއް ކަމަށާއި، މަސްވެރިކަމުގެ ސިނާއަތަށް ގެންނަމުންދާ ބަދަލާއިއެކު، މަސްވެރިންނަށް 48 ގަޑިއިރުތެރޭގައި ފައިސާ ދޫކުރެވޭނެ ކަމަށް އުންމީދު ކުރައްވާ ކަމަށެވެ.
މަސްވެރިކަމުގެ ސިނާއަތަށް ގެންނަމުންދާ ބަދަލުތަކުގެ ތެރޭގައި، ކުރިއަށް އޮތް ދޮޅު އަހަރެއްހާ ދުވަސް ތެރޭގައި ރާއްޖޭގައި އިތުރު މަސް ކާރުޚާނާތައް ތަރައްޤީކުރުން ހިމެނޭ ކަމަށް ވެސް ވަޒީރު ޝިޔާމް ވިދާޅުވިއެވެ.
"މިފްކޯ އަކީ ބްރޭކް އިވަންގައި ހިންގާ ކުންފުންޏަކަށް ހަދައިގެން އެކަން ވެވޭނީ، އެމަސައްކަތް މިކުރަނީ، އަމާޒަކީ މިވަގުތު މި ގެނެވޭ ބަދަލުގައި، އަމާޒަކީ 2 ހަފްތާތެރޭގައި ފައިސާ ދިނުން،"
ވަޒީރު ޝިޔާމް ވިދާޅުވިއެވެ.
ވަޒީރު ޝިޔާމް ވިދާޅުވީ، މިފްކޯއިން މަސް ގަންނަ އަގަށް ގެނެސްފައިވާ ބަދަލާ ގުޅިގެން މި ސިނާޢަތުގައި ހަރަކާތްތެރިވާ އަމިއްލަ ކުންފުނިތަކަށްވެސް ކުރިއެރުންތައް ލިބޭނެ ކަމަށް ޤަބޫލުކުރައްވާ ކަމަށެވެ.
މިފްކޯއިން މަސް ގަންނަ އަގަށް ބަދަލުތަކެއް ގެނެސްފައިވާކަން ހާމަކޮށްފައިވަނީ އިއްޔެއެވެ.
މިގޮތުން މަހުގެ އަގުތަކަށް ގެނައި ބަދަލުތަކާއި ގުޅޭގޮތުން މިފްކޯއިން ބުނީ، ޖުލައި 1 އިން 5 އަށް މިފްކޯގެ ސެންޓަރުތަކުންނާއި ބޯޓުފަހަރުތަކުން އައިސް އަޅާފައިވާ 1.5 ކިލޯއިން މަތީގެ ކަނޑުމަހާއި ކަންނެލި ގަންނާނީ 16 ރުފިޔާއަށް ކަމަށާއި، އައިސް ނާޅާ ކަނޑުމަހާއި ކަންނެލި 14 ރުފިޔާއަށް ކަމަށެވެ.
ހަމައެއާއިއެކު، އައިސް އަޅާފައިވާ 1.5 ކިލޯއަށްވުރެ ދަށް ކަނޑުމަހާއި ކަންނެލި ގަންނާނީ 7 ރުފިޔާއަށް ކަމަށްވާއިރު، އައިސް ނާޅާ ކަނޑުމަހާއި ކަންނެލި ގަންނާނީ 5 ރުފިޔާއަށް ކަމަށް މިފްކޯއިން މަޢުލޫމާތު ދެއެވެ.
Advertisement
This content is created and paid for by advertisers and does not involve Voice Journalists
