އިސްލާމިކް މިނިސްޓްރީން ކުރިއަށް ގެންދާ އިމާމުންނާއި ޚަތީބުންނަށް ތަމްރީން ދިނުމުގެ ޕްރޮގްރާމް ގެ ދަށުން،ރާއްޖޭގެ 20 އިމާމަކު އިތުރު ތަމްރީނު ހޯދުމަށް ބުރޫނާއިއަށް ފޮނުވުމަށް ހަމަޖެހިއްޖެއެވެ.

އިސްލާމީ ކަންތައްތަކާބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު އެކްސްގައި ކުރެއްވި ޕޯސްޓެއްގައި ވިދާޅުވިގޮތުގައި މި މަހުގެ 15 ވަނަ ދުވަހު މި އިމާމުން ބުރޫނާއިއަށް ފުރާނެއެވެ.

ވަޒީރު ޝަހީމް ވިދާޅުވީ، މި ތަމްރީނު ޕްރޮގްރާމް ކުރިއަށްދާނީ ބުރޫނާއިގެ ޤައުމީ އިސްލާމީ ޔުނިވަރސިޓީ، ސުލްޠާން ޝަރީފް އިސްލާމިކް ޔުނިވަރސިޓީގައި ކަމަށެވެ.

Advertisement

މީގެ ކުރިން މި ޕްރޮގްރާމްގެ ދަށުން އިމާމުން މައްކާއަށްވެސް ފޮނުވާފައިވާއިރު، ވަޒީރު ޑރ. ޝަހީމް ވިދާޅުވިގޮތުގައި ޕްރޮގްރާމްގެ ދަށުން ބައިވެރިން ސައުދީގެ އިތުރުން މިޞްރު، މެލޭޝިޔާ، ބުރޫނާއި އަދި އިންޑޮނޭޝިޔާއަށްވެސް ތަޖުރިބާއާއި ތަމްރީނުގެ ދަތުރުތައް ކުރާނެއެވެ.

ހަމައެއާއިއެކު، މިފަދަ ތަމްރީނު ޕްރޮގްރާމެއް މިއަހަރުގެ ފެބްރުއަރީ މަހު ގއ. ގެމަނަފުށީގައި ވެސް ކުރިއަށްގެންދިޔައިރު،  އެ ޕްރޮގްރާމްގައި ދެކުނުގެ ރަށްރަށުން 77 އިމާމުން ބައިވެރިވެފައިވާ ކަން ފާހަގަ ކޮށްލަން ޖެހެއެވެ.

މި ޕްރޮގްރާމްގެ މަޤްޞަދަކީ މިސްކިތްތަކުގައި ތިބި އިމާމުންނަކީ އިލްމީގޮތުން ފުދުންތެރި، ތަމްރީނު ލިބިފައިވާ ބަޔަކަށް ހެދުން ކަމަށް ވަޒީރު ވިދާޅުވިއެވެ.

އިސްލާމިކް މިނިސްޓްރީގެ އަމާޒަކީ މި އަހަރު ނިމޭއިރު ރާއްޖޭގައި މިހާރު ތިބި ހުރިހާ އިމާމުންވެސް މި ޕްރޮގްރާމް ނިންމާފައި ތިބި ބައެއްގެ ގޮތުގައި ހެދުމެވެ.