މިދުވަސްވަރަކީ ރާއްޖޭގައި ރޯގާ އާއްމުވަމުންދާ ދަނޑިވަޅަކަށްވާތީ، މިފަދަ ދުވަސްވަރުގައި ރައްޔިތުންގެ ނަފްސާނީ ދުޅަހެޔޮކަން ކަށަވަރުކުރުމަށް ޚާއްސަ ސަމާލުކަމެއް ދިނުމަށް އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއިން އިލްތިމާސްކޮށްފިއެވެ.

އެ ވުޒާރާއިން ނެރުނު ނޫސްބަޔާނެއްގައި، މިފަދަ ހާލަތްތަކުގައި ނަފްސާނީ ދުޅަހެޔޮކަން ކަށަވަރުކުރުމަށް ކުރެވިދާނެ ބައެއް ކަންކަމާއި ގުޅޭގޮތުން އެ ވުޒާރާއިން ވަނީ އިރުޝާދުތަކެއް ދީފައެވެ.

އެގޮތުން، ހާސްކަމާއި ނުތަނަވަސްކަން އިހުސާސްކުރެވޭނަމަ، އެހެން ފަރާތަކާ އިހުސާސްތައް ހިއްސާކުރުމަށާއި، އޯގާތެރިކަމާއެކު އެކަކު އަނެކަކަށް އަޅާލުމަށާއި، އެކަކު އަނެކަކުގެ ވާހަކަތައް އަޑުއެހުމަށާއި، މަޑުމައިތިރިކަމާއެކު މުޢާމަލާތުކުރުމަށް ވުޒާރާއިން ވަނީ އެދިފައެވެ. އަދި އެހެން މީހުންނާ ގުޅިގެން އުޅުމަށާއި، ކަންކަމުގައި މަޝްއޫލުވެ އުޅުމަށް މަސައްކަތްކުރުމަށާއި، އެއްވެސް ފަރާތެއް ބާކީވާކަމުގެ އިހުސާސް ވިޔަ ނުދިނުމަށް އިލްތިމާސްކޮށްފައިވެއެވެ.

މީގެ އިތުރުން، ނަފްސާނީގޮތުން އެހީތެރިކަން ބޭނުންވާ ފަރާތްތަކަށް (ޢާއިލާގެ ނުވަތަ ރައްޓެހިންނަށް) އެ އެހީތެރިކަމާއި އެއްބާރުލުން ފޯރުކޮށްދިނުމަށްވެސް އިލްތިމާސްކޮށްފައިވާއިރު، ރޯގާ ނުވަތަ ބަލިތައް ފެތުރުން އާންމުވަމުންދާ ހާލަތްތަކުގައި ރައްކާތެރިކަމުގެ ގޮތުން އަޅަންޖެހޭ ފިޔަވަޅުތައް އެޅުމަށް ވެސް އެ ވުޒާރާއިން އެދެއެވެ.

މި ދުވަސްވަރު ރާއްޖޭގައި ހަލުއި ކަމާއި އެކު ރޯގާ ފެތުރެމުންދާއިރު، މިކަމަށް ރައްކާތެރިވެ ތިބުމަށް ކަމާބެހޭ ފަރާތްތަކުންވެސް އަންނަނީ އިރުޝާދު ދެމުންނެވެ.