ކޮރަޕްޝަންފަދަ ގިނަ ތުހުމަތުތަކެއް މިހާރުވެސް ކުރެވިފައިވާ ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން މީހަކަށް 3 ލައްކަ އަށް ވުރެ ގިނަ ރުފިޔާ ދައްކަން ސިވިލް ކޯޓުން ހުކުމްކޮށްފިއެވެ.

މިއީ އަނބުރާ ދައްކާގޮތަށް މިދިޔަ އަހަރުގެ މޭ މަހުގެ 14 ވަނަ ދުވަހު ހުޅުމާލެ، ފްލެޓް ނަންބަރު 04-1-19/ މާލެ، ހަސަން މަނިކު އެފްއޭއެމަށް ދޫކުރި ފައިސާ އަދާކުރުމަށްޓަކައި އެ އެސޯސިއޭޝަނުން ފޮނުވި ޗެކް ރިޓާން ވެފައިވާތީ ހުށަހެޅި މައްސަލައެކެވެ. 

މީގެ އިތުރުން ވެސް ޝަރީއަތަަށް ހިނގި ހަރަދު ހޯދުމަށް ވެސް ހަސަން މަނިކު ވަނީ ހުށަހަޅާފައެވެ.

އެފްއޭއެމަށް ދައުވާގެ ލިޔެކިޔުންތައް ރައްދުކުރި ނަމަވެސް، އެކަމަށް އެ އެސޯސިއޭޝަނުން ރައްދުދީފައިނުވާތީ އެފްއޭއެމްގެ ޣައިރު ހާޒިރުގައި ސިވިލް ކޯޓުން ކުރި ހުކުމްގައި ބުނީ، އެފްއޭއެމުން ހަސަން މަނިކަށް ދޭން ޖެހޭ 20،000 ޑޮލަރު (308،400 ރުފިޔާ) އަދި ޝަރީއަތަށް ހޭދަވި 27،000 ރުފިޔާ 10 ދުވަހުގެ ތެރޭގައި ދައްކަން ޖެހޭނެ ކަމަށެވެ.

އެއާއިއެކު، އެފްއޭއެމުން ހަސަން މަނިކަށް ޖުމްލަ 335،400 ރުފިޔާ ދައްކަން ޖެހޭނެއެވެ.

މިއީ މި ހަފްތާގައި އެފްއޭއެމުން ރުފިޔާ ދެއްކުމަށް ކުރި ދެވަނަ ހުކުމްކަން ފާހަގަކޮށްލަން ޖެހެއެވެ.

މި ހަފްތާގެ އާދިއްތަ ދުވަހުވެސް ޗެކް ރިޓާންވި މައްސަލައެއްގައި އެމްއެސް ފައިނޭންސް ކަރަންސީ އެކްސްޗޭންޖް ޕްރައިވެޓް ލިމިޓެޑަށް 30 ދުވަހުގެ ތެރޭގައި، އެފްއޭއެމުން ދައްކަން ޖެހޭ 771،000 ރުފިޔާ އާއި ޝަރީއަތުގެ ހަރަދަށް ހިނގި 5،000 ރުފިޔާ ދެއްކުމަށް ވަނީ އަމުރުކޮށްފައެވެ.

މި މައްސަލައިގައި ވެސް ސިވިލް ކޯޓުން ހުކުމްކޮށްފައިވަނީ އެފްއޭއެމްގެ ޣައިރު ހާޒިރުގައެވެ.