ކުރިއަށް އޮތް ދުވަސްތަކުގައި ރާއްޖޭގައި އޭލެވެލް އަށް ކިޔަވަން ބޭނުންވާ ކުދިންނަށް އެފުރުސަތު ފަހިކޮށްދިނުމަށް ނިންމަވާފައިވާ ކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ.

ސެންޓަރ ފޯރ ހަޔަރ ސެކަންޑަރީ އެޑިޔުކޭޝަން (ސީއެޗްއެސްއީ) އަށް 45 އަހަރު ފުރުމާއި ގުޅިގެން ބޭއްވި ޚާއްސަ އެސެމްބްލީ ޝަރަފުވެރިކޮށްދެއްވާ ވާހަކަފުޅު ދައްކަވަމުން ރައީސް ޑރ.މުޢިއްޒު ވިދާޅުވީ، މާލޭގައި އާއި ރާއްޖޭގެ ކޮންމެ އަތޮޅެއްގައި ވެސް އޭލެވެލް އަށް ކިޔެވުމުގެ ފުރުސަތު މި އަންނަ އަހަރު ފުޅާ ވާނެ ކަމަށެވެ.

ރައީސް ޑރ.މުޢިއްޒު ވިދާޅުވީ، މިކަމަށްޓަކައި، ރަނގަޅު ޓީޗަރުން ބިނާ ކުރުމުގެ މަސައްކަތް ކުރައްވާނެ ކަމަށާއި، ގެދޮރުގެ ފުރުސަތު ދަރިވަރުންނާއި ބެލެނިވެރިންނަށް ފަހި ކޮށްދިނުމުގެ މަސައްކަތް ފަށާފައިވާ ކަމަށެވެ. ހަމައެއާއިއެކު، ދަރިވަރުން ކިޔަވާ ނިމުމުން، ރާއްޖެ އާއި ރާއްޖެއިން ބޭރުގައި ޔުނިވާސިޓީ ތައުލީމް ހާސިލްކޮށްގެން އައިސް، ވަޒީފާ އަށް ނުކުތުމުގެ ކުރިން އާމްދަނީގެ ފުރުސަތުތައް ހުޅުވާލުމުގެ މަސައްކަތްތައް ކުރަމުންދާ ކަމަށް ވެސް ރައީސް ޑރ.މުޢިއްޒު ވިދާޅުވިއެވެ.

އޭލެވެލް ތައުލީމު ގެ ފުރުސަތުތައް ފަހިކޮށްދިނުމުގެ ގޮތުން ސަރުކާރުން ވަނީ މާލޭގައި ހިންގަމުން އައި ސީއެޗްއެސްއީގެ ކުރީގެ އިމާރާތުގައި މިއަންނަ ސެޕްޓެމްބަރު މަހު އޭލެވެލް ކިޔެވުން ފެށުމުގެ ކުރިން، އޭލެވެލް ކިޔެވެމުގެ އިންތިޒާމު ހަމަޖަހިގެން ދާނެ ކަމަށް ބުނެފައެވެ.