Kaamiyaabee hoadhumugai varugadha azumeh hurun muhinmu: Raees Dr.Muizzu

ކާމިޔާބީ ހޯދުމުގައި ވަރުގަދަ އަޒުމެއް ހުރުން މުހިންމު: ރައީސް ޑރ.މުޢިއްޒު

03 Jul 2024 | 13:52

ރައީސް ޑރ.މުޙައްމަދު މުޢިއްޒު-- ފޮޓޯ: ރައީސް އޮފީސް

ކާމިޔާބީ ހޯދުމުގައި ވަރުގަދަ އަޒުމެއް ހުރުން މުހިންމު ކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ.

ސެންޓަރ ފޯރ ހަޔަރ ސެކަންޑަރީ އެޑިޔުކޭޝަން (ސީއެޗްއެސްއީ)އަށް 45 އަހަރު ފުރުމާއި ގުޅިގެން ބޭއްވި ޚާއްސަ އެސެންބްލީ ޝަރަފުވެރިކޮށްދެއްވާ ވާހަކަފުޅު ދައްކަވަމުން ރައީސް ޑރ.މުޢިއްޒު ވަނީ ކޮންމެ ކަމެއްވެސް ކާމިޔާބުވާނީ އަމިއްލަ ނަފުސަށް އިތުބާރުކުރުމާއެކު ގަދައަޅައި މަސައްކަތް ކުރުމުންކަމަށް ވިދާޅުވެފައެވެ.

ރައީސް ޑރ.މުޢިއްޒު ވިދާޅުވީ، އަމިއްލަ ނަފްސަށް އިތުބާރު ކުރުމުގެ އިތުރުން، ގަދައަޅައި މަސައްކަތް ކުރަން ޖެހޭ ކަމަށާއި، ކިޔަވާ ހުރިހާ މާއްދާއަކުން ހޯދޭނެ އެންމެ ރަނގަޅު ނަތީޖާ ހޯދަން މަސައްކަތް ކުރުމަކީ ވަރަށް މުހިންމު ކަމެއް ކަމަށެވެ.

ކިތަންމެ ކުޑަ ކުޑަ ކަމެއް ވިޔަސް، އެކަމެއް ހާސިލް ކުރެވޭނެ ކަމުގެ ފެންވަރު ހުރިކަމުގެ ޔަގީންކަން އަމިއްލަ ނަފްސަށް އޮންނަން ޖެހޭނެ ކަމަށާއި، ހަޔާތުގައި އަންނަ ކަންތައްތައް ވެސް ކަނޑައްތު ކުރެވޭނީ އަމިއްލަ ނަފްސަށް އިތުބާރުކޮށްގެން ކަމަށްވެސް ރައީސް ޑރ.މުޢިއްޒު ވިދާޅުވިއެވެ.

"ތިމަންނަ އަކަށް ނުވާނޭ. ތިމަންނައަކީ އެހާ މޮޅު ކުއްޖެއް ނޫނޭ ކިޔާފަ ގިވް އަޕް ކުރުމަކީ އެއްވެސް ކަމެއް ހާސިލްވާނެ ކަމެއް ނޫން. ގިވް އަޕް ނުކުރާތި. އެއްވެސް ކަމަކު. އެއްވެސް އިރަކު. އެއްވެސް ކަމެއްގައި އުންމީދު ކަނޑާލައިގެން ނުވާނެ."

ރައީސް ޑރ.މުޢިއްޒު ވިދާޅުވިއެވެ.

ރައީސް ޑރ.މުޢިއްޒުގެ ވާހަކަފުޅުގައި އެމަނިކުފާނު ވަނީ މަތީ ސާނަވީ ތައުލީމު ހާސިލްކުރުމަކީ ދެވަނަ ފަހަރަށް ލިބޭ ފުރުސަތެއްނޫންކަން ފާހަގަކުރައްވައި، މި ފުރުސަތުގެ ބޭނުން ހެޔޮ ގޮތުގައި ހިފުމަށް ދަރިވަރުންނަށް ނަސޭހަތްތެރިވެވަޑައިގެންފައެވެ.

ހަބަރު

ރައީސް ޑޮކްޓަރ މުޙައްމަދު މުޢިއްޒު