މާލޭގައި ފުޅާ ދާއިރާއެއްގައި ޑޮލަރުގެ ވިޔަފާރިކުރި ދެ ބިދޭސީން ރޭ އިމިގްރޭޝަނުން އަތުލައިގެންފިއެވެ.

އިމިގްރޭޝަން މޯލްޑިވްސްއިން މިއަދު އެކްސްގައި ކުރި ޕޯސްޓެއްގައި ބުނީ، ރޭގެ ކުރީކޮޅު މާލޭގައި ހުރި ޑޮލަރު އޭޓީއެމް ކައިރީގައި ޚާއްޞަ ރެއިޑް އޮޕަރޭޝަނެއް ކުރިއަށް ގެން ގޮސްފައިވާ ކަމަށެވެ.

އަދި މި އޮޕަރޭޝަންގައި ބޭރު ފައިސާ ބަދަލުކުރުމުގެ ޙަރަކާތްތަކުގައި ފުޅާ ދާއިރާއެއްގައި ޝާމިލުވެފައިވާ ދެ ބިދޭސީއެއް އިތުރަށް ތަޙްޤީޤުކުރުމަށްޓަކައި ހައްޔަރުކުރެވު ކަމަށެވެ.

Advertisement

އެއީ، ބާބުލް މިއާ ނަމަކަށް ކިޔާ މީހަކާއި މުޙައްމަދު މޮކްޗަންދަލީ ނަމަކަށް ކިޔާ މީހެކެވެ. ދެ މީހުންނަކީ ވެސް ބަންގްލަދޭޝަށް ނިސްބަތްވާ ދެ މީހުންނެވެ.

މީގެ އިތުރުން، ބޭރު ފައިސާ ބަދަލުކުރުމުގެ ޙަރަކާތްތަކުގައި ބައިވެރިވެފައިވާ އިތުރު ބިދޭސީންތަކެއް ވެސް ހައްޔަރުކޮށް، 9 މާރޗް 2024 ގައި ޑިޕޯޓް ކޮށްލާފައިވާ ކަމަށް އިމިގްރޭޝަނުން ބުންޏެވެ.

އިމިގްރޭޝަނުން ބުނެފައިވާ ގޮތުގައި މި އޮޕަރޭޝަން ކުރިއަށް ގެންދިއުމުގައި މޯލްޑިވްސް ޕޮލިސް ސަރވިސްއިން ވަނީ އެހީތެރިކަން ފޯރުކޮށްދީފައެވެ. އަދި މި އެހީތެރިކަމަށް އިމިގްރޭޝަނުން ވަނީ ޝުކުރު އަދާކޮށްފައެވެ.

ގަވާއިދާ ހިލާފަށް އުޅޭ ބިދޭސީންގެ މައްސަލަ ހައްލުކުރަން އިމިގްރޭޝަނުން އިސްނަގައިގެން ކުރިއަށް ގެންދާ އޮޕަރޭޝަންގެ ތެރެއިން މިހާތަނަށް 1،800 އަށްވުރެ ގިނަ ބިދޭސީން ވަނީ ޑީޕޯޓުކޮށްލައިފައެވެ. އޭގެ އިތުރުން ވެސް 100 އަށްވުރެ ގިނަ މީހުން މި ފަހުން ވެސް ވަނީ އިމިގްރޭޝަންގެ ބެލުމުގެ ދަށަށް ގެންގޮސްފައެވެ.