ރައީސް ޑރ.މުޙައްމަދު މުޢިއްޒު އިނގިރޭސި ވިލާތުގެ އައު ބޮޑުވަޒީރު ކީރ ސްޓާމަރ އަށް މަރުހަބާ ދަންނަވައިފިއެވެ.

ރައީސް މުޢިއްޒު އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ ވަރަށް ބޮޑު މޮޅުވުމަކާއެކު ބޮޑުވަޒީރުކަމަށް ހޮވިވަޑައިގެންނެވި ކަމަށްޓަކައި ކީރ ސްޓާމަރ އަދި ލޭބަރ ޕާޓީއަށް މަރުހަބާ ދަންނަވާ ކަމަށެވެ.

އަދި އެ ބޭފުޅުންގެ ޤާބިލު ލީޑަރޝިޕްގެ ދަށުން އިނގިރޭސި ވިލާތަށް ފާގަތިކަމުގެ އައު ފަތިހެއް ފެނިގެންދާނެކަމުގެ ޔަޤީންކަން އޮތް ކަމަށް ވެސް ވިދާޅުވެފައިވެއެވެ.

މީގެ އިތުރުން، ދިވެހި ސަރުކާރާއި ރައްޔިތުންގެ ފަރާތުން އެންމެ ހެޔޮ އެދުންތައް ފޮނުވާ ކަމަށާއި، މިހާރު ވެސް ވަރަށް ގާތް ގުޅުމެއް އޮތް ދެ ޤައުމުގެ ގުޅުން އިތުރަށް ބަދަހިކުރުމަށާއި، ދުނިޔޭގެ ގޮންޖެހުންތަކަށް ޙައްލު ހޯދުމަށް ގާތުން މަސައްކަތްކުރުމަށް އިންތިޒާރުކުރާ ކަމަށް ވެސް ރައީސް މުޢިއްޒު ވިދާޅުވެފައިވެއެވެ.

އިންތިހާބުގެ ވަގުތީ ނަތީޖާއިން ދައްކާގޮތުގައި ލޭބާ ޕާޓީން ވަނީ އިނގިރޭސިވިލާތުގެ މިހާރުގެ ބޮޑުވަޒީރު ރިޝީ ސުނާކް ތަމްސީލުކުރައްވާ ކޮންޒަވޭޓިވް ޕާޓީއާއި ވާދަކުރައްވައިގެން ހައުސް އޮފް ކޮމަންސްގެ 409 ގޮނޑި ކާމިޔާބުކޮށްގެން އިނގިރޭސި ގާނޫނު ހަދާ މަޖިލީހުގެ މެޖޯރިޓީ ހޯދާފަ އެވެ. އެ އަދަދު ލޭބާއަށް ހާސިލުކުރެވިފައިވަނީ ހައުސް އޮފް ކޮމަންސްގެ ޖުމްލަ 650 ގޮނޑީގެ ތެރެއިން ނެވެ.

މިއީ އިނގިރޭސިވިލާތުގެ ތާރީހުގައިވެސް އެއް ޕާޓީއަކަށް އާންމު އިންތިހާބުގައި ލިބުނު އެންމެ ބޮޑު ކާމިޔާބީ ކަމަށް އިނގިރޭސި މީޑިއާތަކުން ރިޕޯޓްކޮށްފައި ވެއެވެ.

ވަގުތީ ނަތީޖާ ދައްކާގޮތުގައި ލޭބާއަށް 409 ގޮނޑި ކާމިޔާބުކުރެވުނުއިރު ކޮންޒަވޭޓިވްއަށް މިހާތަނަށް ހޯދިފައިވަނީ 120 ގޮނޑި އެވެ.