އީރާންގެ އައު ރައީސް ކަމަށް މަސްއޫދު ޕެޒެޝްކިއަން އިންތިހާބުވެވަޑައިގެންފިއެވެ.

ޕެޒެޝްކިއަން ރައީސް ކަމަށް އިންތިހާބު ވެވަޑައިގަތީ، މިމަހުގެ 28 ވަނަ ދުވަހު ކުރިއަށްދިޔަ އެގައުމުގެ ރިޔާސީ އިންތިހާބުގައި ވާދަކުރި އެއްވެސް ކެނޑިޑޭޓަކަށް މެޖޯރިޓީ ނުލިބުމާއި ގުޅިގެން އިއްޔެ ކުރިއަށް ދިޔަ އިންތިހާބުގެ ދެވަނަ ބުރުގައި އެގައުމުގެ ކުރީގެ ނިއުކްލިއާ ނެގޯޝިއޭޓަރު ސައީދު ޖަލީލީ އާއި ވާދަކުރައްވާ، 16.3 މިލިއަން ވޯޓް ހޯއްދަވައިގެންނެވެ.

އީރާނުގެ ދައުލަތުގެ ނޫސް އެޖެންސީ ޕްރެސް ޓީވީން ރިޕޯޓް ކުރި ގޮތުގައި މި އިންތިހާބުގައި ސައީދު ޖަލީލީ އަށް ލިބިވަޑައިގަތީ 13.5 މިލިއަން ވޯޓެވެ.

މިއާއިއެކު، މި އިންތިހާބު ސުޕަވައިޒް ކުރާ އިންޓީރިއާ މިނިސްޓްރީން ވަނީ، ޕެޒެޝްކިއަން މި އިންތިހާބު ކާމިޔާބު ކުރެއްވިކަން ރަސްމީކޮށް އިއުލާން ކޮށްފައެވެ.

އީރާނުގެ އައު ރައީސް ކަމަށް ހޮވިވަޑައިގެން އުމުރުން 69 އަހަރުގެ ޕެޒެޝްކިއަންގެ ބައްޕަ އަކީ އަޒެރީ އަކަށްވާއިރު، މަންމަ އަކީ ކުރުދީ މީހެކެވެ.

2008 ވަނަ އަހަރުން ފެށިގެން އީރާނުގެ އިސްލާމިކް ކޮންސަލްޓޭޓިވް އެސެމްބްލީގެ މެންބަރުކަމުގެ މަގާމް ފުރުއްވަމުންދާ ޕެޒެޝްކިއަން ވަނީ ހިތުގެ ހާއްސަ ޑޮކްޓަރު ކަމުގެ ސަނަދުވެސް ހާސިލް ކުރައްވާފައިއެވެ. 

2013 ވަނަ އަހަރާއި 2021 ވަނަ އަހަރުވެސް ރިޔާސީ އިންތިހާބުގައި ވާދަކުރެއްވައި، ނާކާމިޔާބީ އާއި ކުރިމަތިލައްވަން ޖެހިވަޑައިގެން ޕެޒެޝްކިއަން ވަނީ މީގެ ކުރިން 2001 ވަނަ އަހަރުން ފެށިގެން 2005 ވަނަ އަހަރާއި ހަމައަށް އީރާނުގެ މިނިސްޓަރ އޮފް ހެލްތު އެންޑް މެޑިކަލް އެޑިއުކޭޝަން ގެ މަގާމު ފުރުއްވާފައެވެ.