އިނގިރޭސި ވިލާތުގެ ބޮޑު ވަޒީރުކަމަށް އަލަށް އިންތިހާބުވެވަޑައިގެން ކީރ ސްޓާމަރގެ އައު ކެބިނެޓް އިއުލާނުކޮށްފިއެވެ.

މިދިޔަ ހުކުރު ދުވަހު ކީރ ސްޓާމަރ އިއުލާނު ކުރެއްވި މި ކެބިނެޓްގައި ބޮޑުވަޒީރު ނައިބު އަދި ސެކްރެޓަރީ އޮފް ސްޓޭޓް ފޮރ ލެވެލިންގ އަޕް، ހައުސިންގ އެންޑް ކޮމިއުނިޓީސްގެ އައްޔަނުކޮށްފައިވަނީ އެންޖެލާ ރޭނަރއެވެ. އެގައުމުގެ ލޭބަރ ޕާޓީގެ ފާހަގަކޮށްލެވޭ ޝަޚްޞިއްޔަތެއްކަމަށްވާ ރޭނަރ އަކީ އިނގިރޭސިވިލާތުގެ އިޖްތިމާޢީ ހަމަހަމަކަމާއި ބޯހިޔާވަހިކަމުގެ އިޞްލާޙުތަކާ ގުޅޭގޮތުން ސަރުކާރުގެ އެޖެންޑާ ކުރިއަށް ގެންދިއުމުގައި މުހިންމު ދައުރެއް އަދާކުރުމަށް ހަމަޖެހިފައިވާ ފަރާތެކެވެ.

އިނގިރޭސިވިލާތުގެ  ޗާންސެލަރ އޮފް އެކްސްޗެކަރ (މާލީ ވަޒީރު) ގެ މަޤާމަށް ރޭޗެލް ރީވްސް އައްޔަނުކުރެވުމާއިއެކު، އޭނާ ވެގެން ގޮސްފައިވަނީ އެގައުމުގެ 800 އަހަރުވީ ތާރީހުގައި ވެސް އެމަގާމު ފުރުއްވާނެ ފުރަތަމަ އަންހެން ބޭފުޅާއެވެ. މިކަމާއި ގުޅިގެން ރީވްސް ވިދާޅުވީ، މިއީ އެކަމަނާގެ ހަޔާތުގައި ވެސް ލިބުނު އެންމެ ބޮޑު ޝަރަފުކަމަށާއި، އިޤްތިޞާދީ ކުރިއެރުމަކީ މީގެ ކުރިން ލޭބަރ ޕާޓީގެ މިޝަނަށްވީ ނަމަވެސް، މިހާރު އެއީ ޤައުމީ މިޝަނެއް ކަމަށެވެ.

ދުނިޔޭގެ އިޤްތިޞާދީ ގޮންޖެހުންތަކާއި ޖިއޯޕޮލިޓިކަލް ގުޅުންތަކުގެ މުހިންމު ދަނޑިވަޅެއްގައި އިނގިރޭސިވިލާތުގެ ބޭރުގެ ކަންކަމާބެހޭ މިނިސްޓަރުކަމަށް ޑޭވިޑް ލެމީ އައްޔަނުކޮށްފައިވާއިރު، ޤައުމުގެ އެތެރޭގެ ސަލާމަތާއި، އިމިގްރޭޝަނާއި، ޤާނޫނާއި އަމަން އަމާންކަން ބެލެހެއްޓުމުގެ މަސްއޫލިއްޔަތު އަދާކުރާ ހޯމް ސެކްރެޓަރީގެ މަގާމަށް އައްޔަނުކޮށްފައިވަނީ އިވެޓް ކޫޕަރއެވެ.

ހަމައެއާއިއެކު، އެގައުމުގެ ދިފާޢީ ވަޒީރުކަމަށް މީގެ ކުރިން ސަރުކާރުގެ ގިނަ މަގާމުތަކެއް ފުރުއްވި ޖޯން ހީލީ ވަނީ އައްޔަނުކޮށްފައެވެ.

މި އައްޔަންކުރުންތަކާއެކު އިނގިރޭސިވިލާތުގެ ސިޔާސީ މަޝްރަހުގައި މީގެކުރިން ބަދަލުނުވެ ހުރި ގިނަޒަމާންވީ އާދަތަކެއް މިވަނީ ބަދަލުކޮށްފައެވެ.

އިނގިރޭސި ވިލާތުގެ ބޮޑު ވަޒީރުކަމަށް ކީރ ސްޓާމަރ އިންތިހާބުވެ ވަޑައިގަތީ ބުރާސްފަތި ދުވަހުގެ އިންތިޚާބުގައި ލޭބަރ ޕާޓީއަށް 650 ދާއިރާގެ ތެރެއިން 412 ދާއިރާއެއް ކާމިޔާބުކުރެވުމާއި ގުޅިގެންނެވެ. މިއީ ވޯޓުގެ 33.7 އިންސައްތައެވެ.

ވޭތުވެދިޔަ 14 އަހަރު އިނގިރޭސިވލާތުގައި ވެރިކަން ކުރި ކޮންސަވޭޓިވް ޕާޓީއަށް މިފަހަރު އިންތިހާބުގައި ލިބުނީ، 23.7 އިންސައްތައެވެ. މިފަހަރުގެ އިންތިހާބުގައި އެ ޕާޓީއަށް 471 ގޮނޑިން 250 ގޮނޑި ގެއްލިފައިވާއިރު، އެމީހުންނަށް ކާމިޔާބު ކުރެވުނީ 141 ގޮނޑި އެވެ.

މި އިންތިހާބުގައި ކުރިމަތިލައްވަން ޖެހިވަޑައިގެން ނާކާމިޔާބީ އާއިއެކު، އެގައުމުގެ ބޮޑުވަޒީރު ކަމުގެ މަގާމު އެންމެ ފަހުން ފުރުއްވި ރިޝީ ސުނަކް ވަނީ ބޮޑުވަޒީރު ކަމުގެ މަގާމުންނާއި ކޮންސަވޭޓިވް ޕާޓީގެ ލީޑަރު ކަމުގެ މަގާމުން އިސްތިއުފާ ދެއްވާފައެވެ.