ވޭސްޓް މެނޭޖްމަންޓް ކޯޕަރޭޝަން (ވެމްކޯ) އިން އިމާރާތްތައް ފޮޅާ ސާފު ކުރުމުގެ ޚިދުމަތް ދޭން ފަށަން ތައްޔާރުވަމުންދާ ކަމަށް އެ ކުންފުނިން ހާމަކޮށްފިއެވެ.

ޕީއެސްއެމް ނިއުސްގެ "ރާއްޖެ މިއަދު" ޕްރޮގްރާމުގައި ވެމްކޯގެ ޑެޕިއުޓީ މެނޭޖިން ޑިރެކްޓަރު މުހައްމަދު އަބްދުލްކަރީމް  ވިދާޅުވި ގޮތުގައި، އިމާރާތްތައް ފޮޅާ ސާފު ކުރުމުގެ ޚިދުމަތް ދިނުމަށް ވަރަށް ގިނަ ބަޔަކު ދަނީ އެދެމުންނެވެ.

ވެމްކޯއިން މި ޚިދުމަތް ފެށުމަށް ނިންމީ ވެމްކޯއަކީ ސަރުކާރަށް ފައިދާވާ ކުންފުންޏަކަށް ހެދުމުގެ ގޮތުންކަމަށާއި، އެއީ ސަރުކާރު ހިއްސާވާ ކުންފުންޏަކަށްވާތީ ބިޑިންގއެއް ނޯންނާނެ ކަމަށްވެސް މުހައްމަދު އަބްދުލްކަރީމް ވިދާޅުވިއެވެ.

Advertisement

މުހައްމަދު އަބްދުލްކަރީމް ވިދާޅުވީ، މި ޚިދުމަތް ފެށުމަށްޓަކައި ދެ ޚިދުމަތް އެއްކޮށްފައި ސަރުކާރު އޮފީސްތަކަށް ޚާއްސަކޮށްގެން ފަށާ ޕްރޮގްރާމުގައި ބައެއް ބޭފުޅުންނާއި މަޝްވަރާ ކުރަމުން ދާކަމަށާއި، ޚިދުމަތް ފެށުމަށް ވާން ޖެހޭ ތައްޔާރީތަކުގެ ތެރެއިން މުވައްޒަފުންގެ ތަމްރީނު ޕްރޮގްރާމުތައް މިހާރު ފަށާފައިވާ ކަމަށެވެ.

ޚިދުމަތް ރަސްމީކޮށް ލޯންޗުކުރުން ވަރަށް އަވަހަށް އިއުލާން ކުރާނެ ކަމަށް އަބްދުލްކަރީމް ވިދާޅުވިއެވެ.

ވެމްކޯ ގެ ހިދުމަތްތަކުގެ ތެރެއަށް ފޮޅާ ސާފު ކުރުން އިތުރުކޮށް އެ ހިދުމަތް ދިނުމަށް ނިންމައި،އެކަމަށް ތައްޔާރުވާން ފަށާފައިވާކަން އެކުންފުނިން ހާމަކޮށްފައިވަނީ މިއަހަރުގެ މޭމަހުގެ ތެރޭގައެވެ.

މިގޮތުން ވެމްކޯއިން ބުނީ، ފޮޅާ ސާފުކުރުމުގެ ހިދުމަތް ފުރަތަމަ ދޭން ނިންމާފައިވަނީ ސަރުކާރުގެ އިދާރާތަކާއި އޮފީސްތަކަށް ކަމަށާއި އެ ހިދުމަތަށް ޑިމާންޑް އޮތް ނަމަ އެ ކުންފުނިން އިތުރަށް އެ ހިދުމަތް ފުޅާ ކުރާނެ ކަމަށެވެ.