ރާއްޖެއިން ފެނުނު ނުރައްކާތެރި ބައްޔެއް ކަމަށްވާ މެނިންގޮކޯކަލް ބަލީގެ ކޮންޓެކްޓް ޓްރޭސިންގެ މަސައްކަތް ނިމިފައިވާ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނެފިއެވެ.
އެޗްޕީއޭއިން މީޑިއާތަކަށް ފޮނުވި މެސެޖެއްގައި ބުނީ، ކޮންޓެކްޓް ޓްރޭސިންގެ މަސައްކަތް ނިމުނުއިރު، މެނިންގޮކޯކަލް ބަލީގެ ކްލޯޒް ކޮންޓެކްޓުންނަށް ބޭސް ދެވިފައިވާ ކަމަށާއި، އެ ބަލީގެ އިތުރު ކޭސް އެއް އެޗްޕީއޭ އަށް ރިޕޯޓް ކުރެވިފައި ނުވާ ކަމަށެވެ.
މީގެ ކުރިން ދައުލަތުގެ މީޑިއާ، ޕީއެސްއެމްގެ "ރާއްޖެ މިއަދު" ޕްރޮގްރާމްގައި ވާހަކަފުޅު ދައްކަވަމުން އެޗްޕީއޭގެ ޑެޕިއުޓީ ޑިރެކްޓަރ ޖެނެރަލް އޮފް ޕަބްލިކް ހެލްތު އިބްރާހިމް އަޝްރަފް ވަނީ ނިންގޯކޮކަލް ބަލީގެ ކޭސް އެއް ރާއްޖެއިން ފެނުމާއިއެކު، ކޮންޓެކްޓް ޓްރޭސިންގެ މަސައްކަތް ފެށުނު ކަމަށާއި، އެ މަސައްކަތުގެ ތެރެއިން މިހާތަނަށް 46 ކޮންޓެކްޓެއް ފާހަގަކުރެވިފައިވާ ކަމަށް ވިދާޅުވެފައެވެ.
ހަމައެއާއިއެކު، ސިއްހީ ވުޒާރާއިން ވެސް ވަނީ މެނިންގޮކޯކޮލް ބަލި ރާއްޖޭގައި މިހާތަނަށް ނުފެތުރޭ ކަމަށާއި، ސިއްހީ ދާއިރާގައި މަސައްކަތްކުރާ ފަރާތްތަކާއި އާއްމުން މި ބަލީގެ ވެކްސިން ޖަހަން ޖެހޭ ފަދަ ހާލަތެއް ކުރިމަތިވެފައިނުވާކަމަށް ބުނެފައެވެ.
އެހެންނަމަވެސް، އެ ވުޒާރާއިން ވަނީ ހައްޖާއި އުމްރާ ދާ މީހުންނާއި މެނިންގޮކޯކޮލް ބަލި ފެތުރޭ ގައުމުތަކަށް ދަތުރުކުރާ މީހުންގެ އިތުރުން ވަކި ހާއްސަ ހާލަތެއް ކުރިމަތިވެފައިވާ މީހުން މި ވެކްސިން ފުރިހަމަ ކުރުމަށް އިލްތިމާސްކޮށްފައެވެ.
މިއީ ރާއްޖެއިން ނުފެންނަ ބައްޔެއް ނަމަވެސް، އިންވޭސިވް މެނިންގޯކޮކަލް ފެނިފައިވަނީ، މަޝްހޫރު ފުޓުބޯޅަ ކުޅުންތެރިޔާ މުޙައްމަދު ޢާރިފު (ބަކާ) ގެ ގައިންނެވެ. ބަކާ ވަނީ، ޙައްޖުގެ މާތް އަޅުކަން އަދާ ކުރުމަށްފަހު އެނބުރި އައިފަހުން، ކުއްލިއަކަށް، ޙާލު ދެރަވެ، އައިސީޔޫގައި ފަރުވާ ދެމުން ދަނިކޮށް ނިޔާވެފައެވެ.
އެކަމާއި ގުޅިގެން ބަކާ އާއި ކޮންޓެކްޓްވި މީހުންގެ ކޮންޓެކްޓް ޓްރޭސިންގް ހަދާ، ކޮންޓެކްޓްވީ ފަރާތްތަކަށް މައުލޫމާތު ދީ، ބަލިން ރައްކާތެރިވުމަށްދޭ ޕްރޮފައިލެކްޓިކް ބޭސް ދޭން ފަށާފައިވާކަން އޭރު އެޗްޕީއޭއިން ހާމަކުރިއެވެ.
ނައިސެރިއާ މެނިންޖައިޓިޑިސް ކިޔާ ބެކްޓީރިއާއަކުން ޖެހޭ މި ބައްޔަކީ ނޭވާލާ ނިޒާމުގެ ޒަރިއްޔާއިން ފެތުރޭ ބައްޔެކެވެ. މި ބަލީގެ އަލާމާތްތައް ފެންނާނީ ބަލިޖެހޭތާ އެއް ދުވަހާއި 10 ދުވަހާ ދެމެދުގައެވެ.
މި ބަލީގެ ސަބަބުން، ގުނަވަންތައް ފެއިލްވުމަށް މަގު ފަހި ވާއިރު، މައިބަދައާއި ސިކުނޑިއަށް ވެސް ގެއްލުންވެއެވެ.
Advertisement
This content is created and paid for by advertisers and does not involve Voice Journalists
