އީރާންގެ އައު ރައީސް ކަމަށް އިންތިހާބުވެވަޑައިގެން މަސްއޫދު ޕެޒެޝްކިއަން އަށް ރައީސް ޑރ.މުޢިއްޒު މަރުހަބާ ވިދާޅުވެއްޖެއެވެ.

ޕެޒެޝްކިއަން އަށް މަރުހަބާ ވިދާޅުވެ ރައީސް ޑރ.މުޢިއްޒު އެކްސް ގައި ކުރެއްވި ޕޯސްޓެއްގައި ވިދާޅުވީ، ދެގަައުމުގެ ދެމެދުގައިވާ ގުޅުން އިތުރަށް ބަދަހި ކުރުމަށް އެކުގައި މަސައްކަތްކުރުމަށް އުންމީދުކުރައްވާ ކަމަށެވެ.

ހަމައެއާއިއެކު، އީރާނާއި އެގައުމުގެ ހިމެނޭ ސަރަޙައްދުގައި ސުލްޙަ އާއި ފާގަތިކަން ކުރިއެރުވުމަށް ކުރައްވާ މަސައްކަތަށް ކާމިޔާބީ ލިބުމަށް ވެސް ރައީސް ޑރ.މުޢިއްޒު ވަނީ އެދިވަޑައިގެންފައެވެ.

Advertisement

އީރާނުގެ ރައީސް ކަމަށް ޕެޒެޝްކިއަން އިންތިހާބު ވެވަޑައިގަތީ، މިމަހުގެ 28 ވަނަ ދުވަހު ކުރިއަށްދިޔަ އެގައުމުގެ ރިޔާސީ އިންތިހާބުގައި ވާދަކުރި އެއްވެސް ކެނޑިޑޭޓަކަށް މެޖޯރިޓީ ނުލިބުމާއި ގުޅިގެން އިއްޔެ ކުރިއަށް ދިޔަ އިންތިހާބުގެ ދެވަނަ ބުރުގައި އެގައުމުގެ ކުރީގެ ނިއުކްލިއާ ނެގޯޝިއޭޓަރު ސައީދު ޖަލީލީ އާއި ވާދަކުރައްވާ، 16.3 މިލިއަން ވޯޓް ހޯއްދަވައިގެންނެވެ.

އީރާނުގެ އައު ރައީސް ކަމަށް ހޮވިވަޑައިގެން އުމުރުން 69 އަހަރުގެ ޕެޒެޝްކިއަންގެ ބައްޕަ އަކީ އަޒެރީ އަކަށްވާއިރު، މަންމަ އަކީ ކުރުދީ މީހެކެވެ.

2008 ވަނަ އަހަރުން ފެށިގެން އީރާނުގެ އިސްލާމިކް ކޮންސަލްޓޭޓިވް އެސެމްބްލީގެ މެންބަރުކަމުގެ މަގާމް ފުރުއްވަމުންދާ ޕެޒެޝްކިއަން ވަނީ ހިތުގެ ހާއްސަ ޑޮކްޓަރު ކަމުގެ ސަނަދުވެސް ހާސިލް ކުރައްވާފައިއެވެ. 

2013 ވަނަ އަހަރާއި 2021 ވަނަ އަހަރުވެސް ރިޔާސީ އިންތިހާބުގައި ވާދަކުރައްވައި، ނާކާމިޔާބީ އާއި ކުރިމަތިލައްވަން ޖެހިވަޑައިގެން ޕެޒެޝްކިއަން ވަނީ މީގެ ކުރިން 2001 ވަނަ އަހަރުން ފެށިގެން 2005 ވަނަ އަހަރާއި ހަމައަށް އީރާނުގެ މިނިސްޓަރ އޮފް ހެލްތު އެންޑް މެޑިކަލް އެޑިއުކޭޝަން ގެ މަގާމު ފުރުއްވާފައެވެ.