ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު، ހިޖުރީ އައު އަހަރުގެ ތަހުނިޔާ އިސްލާމީ ޤައުމުތަކުގެ ވެރިންނަށް ފޮނުއްވައިފިއެވެ.

1446 ވަނަ އިސްލާމީ އައު އަހަރު އައުމުގެ މުނާސަބަތުގައި އިސްލާމީ ޤައުމުތަކުގެ ވެރިންނަށް ވަރަށް އިޚްލާޞްތެރިކަމާއެކު ރައީސް ޑރ.މުޢިއްޒު ތަހުނިޔާ ވިދާޅުވެފައިވަނީ ވަކި ވަކިންނެވެ.

މި ގޮތުން ރައީސް ޑރ.މުޢިއްޒު ފޮނުއްވި މެސެޖްގައި އެމަނިކުފާނު ވަނީ، މި އައު އަހަރަކީ ދުނިޔޭގެ އެކި ކަންކޮޅުތަކުގައި ތިބި އިސްލާމީ އަޚުންނާއި އުޚުތުންނަށް އުފާވެރިކަމާއި، ހަމަޖެހުމާއި، އެއްބައިވަންތަކަން ގެނެސްދެއްވުމަށާއި، ޚާއްޞަގޮތެއްގައި ހާލުގައި ޖެހިފައިވާ ފަރާތްތަކަށް މާތްﷲގެ ރަޙްމަތާއި ބަރަކާތް ލެއްވުން އެދި ދުޢާ ދަންނަވާފައިއެވެ.

Advertisement

ހަމައެއާއިއެކު، މާތްﷲ، އިސްލާމީ އުންމަތުގެ ޞުލްޙަމަސަލަސްކަމާއި އެއްބައިވަންތަކަމާއި އުފާ ފާގަތިކަމަށްޓަކައި ޤައުމުތަކުގެ ގުޅުން ވަރުގަދަކުރެއްވުން އެދި ރައީސް ޑރ.މުޢިއްޒުގެ މެސެޖްގައި އެމަނިކުފާނު ވަނީ ދުޢާ ދަންނަވާފައިވެއެވެ.