އެއްމަސްދުވަހުގެ ތެރޭގައި ސަރުކާރުން އުތުރުގައި ބަންކަރިންގެ ޚިދުމަތް ފަށާނެ ކަމަށް އިގުތިސާދީ ކަންކަމާ ބެހޭ ވަޒީރު މުހައްމަދު ސައީދު ވިދާޅުވެއްޖެއެވެ.
ސަރުކާރުން ހިންގާ މައި ޕާޓީން ރޭގައި ބޭއްވި ޖަގަހަ ޖަލްސާގައި ވާހަކަފުޅު ދައްކަވަމުން ވަޒީރު ސައީދު ވިދާޅުވީ، ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ހުވާ ކުރެއްވުމާއިއެކު، ތިލަދުންމަތީގައި ބަންކަރިންގެ ހިދުމަތްތަކެއް ފަށާނެ ވާހަކަދައްކާފައިވާ ކަމަށެވެ.
އެގޮތުން އެ މަސައްކަތުގެ ތެރެއިން، އެންމެ 6 މަސްދުވަހުގެ ތެރޭގައި، އެސްޓީއޯއިން ބޮޑު 2 ޓޭންކަރު ގަނެފައިވާ ކަމަށާއި، އެމްއެންޑީއެފާއި އެކު އެސްޓީއޯއިން ޗާޓު އަޕްޑޭޓް ކުރުމުގެ މަސައްކަތްތައް ކުރަމުން އަންނަ ކަމަށް ވަޒީރު ސައީދު ވިދާޅުވިއެވެ. ހަމައެއާއިއެކު ކަސްޓަމާއި އިމިގްރޭޝަނުންވެސް މި ހިދުމަތާއި ގުޅިގެން ކުރަން ޖެހޭ ކަންކަމުގެ އެންމެ ފަހުގެ މަސައްކަތްތައް ކުރަމުން އަންނަ ކަމަށްވެސް ވަޒީރު ވަނީ ވިދާޅުވެފައެވެ.
ބަންކަރިންގެ ހިދުމަތް ފެށުމަށް ފެށުމަށް ބޭނުންވާ އާލާތްތަކާއި އެކި އެކި ރައްކާތެރިކަމަށްޓަކައި ތިމާވެއްޓަށް ކޮށްފާނެ އަސަރަކާއި އެނޫންވެސް ކަންކަމުން ކުރީ ބައިގައި ސަލާމަތްވުމަކީ އެހެން ގައުމުތަކުން ވެސް ކުރާކަމެއްކަން ފާހަގަކުރައްވާ ވަޒީރު ސައީދު ވިދާޅުވީ، އެ މިންގަނޑުގެ ތެރެއިން ރާއްޖެ ކުރަން ޖެހޭ މަސައްކަތްތައް ކުރަމުންދާ ކަމަށެވެ.
މީގެ އިތުރުންވެސް ވަޒީރު ސައީދު ވިދާޅުވީ، ބަންކަރުންގެ ހިދުމަތުގެ ވަޒީފާއަށް ބޭނުންވާ 40 މީހުން އައްޔަނުކުރުމަށްޓަކައި އިއުލާނުކޮށްފައިވާ ކަމަށެވެ.
"މިހާރު އަޅުގަނޑު މިވާހަކަ ދައްކަމުން ދާއިރު އެންމެ 6 ދުވަސްތެރޭގައި އިރާދަކޔރެއްވިއްޔާ ބަންކަރިންގެ ހިދުމަތަށް ވަޒީފާއަށް ނެގުމަށްޓަކައި، 40 މީހުންގެ ވަޒީފާ މީގެ ގާތްގަނޑަކަށް ތިން ހަފްތާ ކުރިން އެސްޓިއޯ އިން ވަނީ އިއުލާނުކޮށްފައި. އަދި އިރާދަކުރެއްވިއްޔާ މިއަދުން ފެށިގެން އަޅުގަނޑަށް މި ސްޓޭޖަށް އަންނަން މައުލޫމާތު ނަގާލިއިރު، މިއަދުން ފެށިގެން އިރާދަކުރެއްވިއްޔާ 1 މަސްދުވަސް ތެރޭގައި ބަންކަރުންގެ ހިދުމަތް ސަރުކާރުން ރަސްމީކޮށް އުތުރުގައި ފައްޓާނެ."
ވަޒީރު ސައީދު ވިދާޅުވިއެވެ.
ވަޒީރު އިތުރަށް ވިދާޅުވީ، މި އަހަރުގެ ޖުލައި ނިމޭއިރު، ބަންކަރިންގެ ހިދުމަތް ފެށުމުން، އަންނަ އަހަރުގެ ޖުލައި މަސް ފެށެންވާއިރަށް ރާއްޖޭގެ ޖީޑީޕީގެ ގޮތުގައި މިހާރު އޮތް 6.5 ބިލިއަން ޑޮލަރުގެ ތެރެއަށް 400 މިލިއަން ޑޮލަރު އިތުރުވާނެ ކަމަށެވެ.
ޖުލައި މަސް ނިމުމުގެ ކުރިން ބަންކަރިންގެ ވިޔަފާރި އިހަވަންދިއްޕޮޅުގައި ފެށޭނެ ކަމަށް މީގެ ކުރިން ރައީސް ޑރ.މުޢިއްޒު ހއ.ހޯރަފުއްޓަށް ވަޑައިގެން އެރަށުގެ ރައްޔިތުންނާއި ބައްދަލުކުރެއްވުމަށް ބޭއްވި ޖަލްސާގައި ވާހަކަފުޅު ދައްކަވަމުން ވަޒީރު ސައީދު ވަނީ ވިދާޅުވެފައެވެ.
އެއާއިއެކު، މޯލްޑިވްސް އިކޮނޮމިކް ގޭޓްވޭ ޕްރޮޖެކްޓްގެ ދަށުން އިހަވަންދިއްޕޮޅުގައި ބައިނަލްއަގުވާމީ ބަންކަރިން ފެސިލިޓީއެއް ފެށުމުގެގޮތުން އެސްޓީއޯއާއި އަދި ވިޓޯލް ގުރޫޕާއި ދެމެދު ޓާރމް ޝީޓްގައި މިދިޔަ މާޗުމަހު ވަނީ ސޮއިކޮށްފައެވެ.
Advertisement
This content is created and paid for by advertisers and does not involve Voice Journalists
