ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ރައްޔިތުންނާއި ބައްދަލުކުރެއްވުމަށް އަތޮޅުތެރެއަށް ކުރައްވާ ދަތުރުފުޅުތައް 2 މަސްފަހުން އަނެއްކާވެސް ފައްޓަވާނެކަމަށް ވިދާޅުވެއްޖެއެވެ.

ސަރުކާރުން ހިންގާ މައި ޕާޓީ، ޕީއެންސީން ރޭގައި ބޭއްވި ޖަގަހަ ޖަލްސާގައި ވާހަކަފުޅު ދައްކަވަމުން ރައީސް ޑރ.މުޢިއްޒު ވިދާޅުވީ، މިއަހަރު ނިމެންވާއިރަށް ހުރިހާ ރަށަކަށް ދާނެކަމަށް ވައުދުވިނަމަވެސް، އަދިވެސް ނުދެވި 130 ވަރަކަށް ރަށް އެބަ އޮތް ކަމަށާއި، މިއަހަރުގެ ބާކީ އޮތް 5 މަސްދުވަހުގެ ތެރޭގައި މިހުރިހާ ރަށަކަށް ދިޔުމަށް ވަރަށް ބޮޑު ޚަރަދެއް ހޭދަވާ ކަމަށެވެ.

މި ހަފްތާގައި މި ދަތުރުތައް ފަށަން މީގެ ކުރިން ނިންމެވިނަމަވެސް، މި ޚަރަދު މިވަގުތު ކުރުމަށްވުރެ މިހާރު ރާއްޖޭގެ އިގްތިސާދު ކުރިއެރުވުމަށް ގެންނަ އިސްލާހުތަކާއިއެކީގައި އެކަންތައް ފަސްކޮށްލެއްވީ ކަމަށް ރައީސް ޑރ.މުޢިއްޒު ވިދާޅުވިއެވެ.

ރައީސް ޑރ.މުޢިއްޒު ވިދާޅުވީ، ރައްޔިތުން ބޭނުންވާކަންތައްތައް ސީދާ ރައްޔިތުންގެ ކިބައިން، ރައްޔިތުންގެ ކައިރީގައި ހުންނަވައިގެން އަޑުއެއްސެވޭނެ ކަމަށާއި، ގޭގެއަށް ދިޔުމާއި ރައްޔިތުންނާއި ބައްދަލުކޮށް އެކިކަހަލަ ބައްދަލުވުންތައް ބޭއްވޭނެ ކަމަށެވެ. އަދި ދަތުރުފުޅުތައް ކުރައްވަން ބޭނުންވަނީ ރައްޔިތުންނާއި ސަލާމްކޮށް، ޖަލްސާއެއް ބޭއްވުމަށްފަހު ފުރަންނޫން ކަމަށް ވެސް ރައީސް ޑރ.މުޢިއްޒު ވިދާޅުވިއެވެ.

މީގެ އިތުރުންވެސް، ރައީސް ޑރ.މުޢިއްޒު ވިދާޅުވީ، މާލޭގެ ރައްޔިތުންނާއި ބައްދަލުކުރުމުގެ ގޮތުން ވަރަށް އަވަހަށް ރަސްމީ މަސައްކަތުގެ ތެރެއިން ހަފްތާގެ ކަނޑައެޅޭ ކޮންމެވެސް އެއްދުވަހެއްގެ ހަވީރު ގޭގެއަށް ވަޑައިގަންނަވާނެ ކަމަށާއި، އެކިކަހަލަ ބައްދަލުވުންތައް ބާއްވާނެ ކަމަށެވެ.

މިއަހަރު ނިމުމުގެ ކުރިން ރާއްޖޭގެ ހުރިހާ ރަށަކަށް ޒިޔާރަތްކުރެއްވާނެކަމަށް ރައީސް ޑރ.މުޢިއްޒު މީގެ ކުރިން ވިދާޅުވިއިރު، އެމަނިކުފާނު ވަނީ ވެރިކަމުގެ ފުރަތަމަ 6 މަސްތެރޭގައި ގާތްގަނޑަކަށް 70 ރަށަށް ވަޑައިގެން 150އަށް ވުރެ ގިނަ ކައުންސިލާ ބައްދަލުކުރައްވާފައެވެ.