ގައުމުތަކުން ރާއްޖެ އަށް ކަނޑައަޅާ އައު 7 ސަފީރުންގެ ސަފީރުކަމުގެ ފަތްކޮޅު ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު އަށް އަރުވައިފިއެވެ.

ވަކިވަކިން ބޭއްވި މި ރަސްމިއްޔާތު ތަކުގައި ކޮންމެ ސަފީރަކުވެސް ޖުމްހޫރީ މައިދާނުން ފެށިގެން ރައީސުލްޖުމްހޫރިއްޔާގެ އޮފީހާއި ހަމައަށް ވަޑައިގެންނެވީ ހަތްކޮޅުގައި ރަސްމީ އިއްޒަތުގައި ބެރު ދުންމާރި ތާޅަފިލީގައި، ހެވިކަމުގެ ލަޝްކަރީންނާއެކު ހިންގަވައިފައެވެ.

ސަފީރުކަމުގެ ފަތްކޮޅު ރައީސް ޑރ.މުޢިއްޒު އަށް އެރުއްވީ:

1) ތުރުކީވިލާތުގެ އައު ސަފީރު، ސެމީ ލުޓްފު ޓުރްގުޓް

2) ލިތުއޭނިޔާގެ އައު ސަފީރު، ޑަޔަނާ މިކެވިޗިއެނޭ

3) އުރުދުންގެ އައު ސަފީރު، ޑޮކްޓަރ މައެން ޚުރައިސަތު

4) ޒެމްބިއާގެ އައު ސަފީރު، ޕަރސީ ޕެޓްސަން ޗަންދާ

5) ރޫމޭނިއާގެ އައު ސަފީރު، ސްޓެލުޓާ އާރިހަޔަރ

6) ތައިލެންޑްގެ އައު ސަފީރު، ޕައިޓޫން މަހާޕަންނާޕޮން

7) ކޮރެއާގެ އައު ސަފީރު، މިޔޮންގ ލީ

އައު ސަފީރުން، ސަފީރުކަމުގެ ފަތްކޮޅު ރައީސް ޑރ.މުޢިއްޒު އަށް އެރުވުމުން، އެމަނިކުފާނު ވަނީ ތަހުނިޔާ ވިދާޅުވެ، ދިވެހިރާއްޖެއަށް ވަޑައިގެންނެވިކަމަށްޓަކައި މަރްޙަބާ ވިދާޅުވެފައެވެ.

އެއަށްފަހު ރައީސް ޑރ.މުޢިއްޒު ވަނީ އައު ސަފީރުންނާއި އެކު ވަކި ވަކިން ބޭއްވި މި ރަސްމިއްޔާތުގެ ތެރޭގައި، ކޮންމެ ސަފީރަކާއި އެކުވެސް، ދެޤައުމުގެ ގުޅުން އިތުރަށް ބަދަހިކުރެވިދާނެ ދާއިރާތަކާ ގުޅޭގޮތުން މަޝްވަރާކުރައްވާފައެވެ.