އެމްޑީޕީގެ ނައިބު ރައީސްގެ މަގާމަށް މަޖިލީހުގެ ތުޅާދޫ ދާއިރާގެ ކުރީގެ މެމްބަރު އަދި އެ ޕާޓީގެ ލީގަލް ޑިރެކްޓަރު ހިސާން ހުސައިން އައްޔަނުކުރުމަށް ހުށަހަޅުއްވައިފިއެވެ.
އެމްޑީޕީގެ ރައީސް އަބްދުﷲ ޝާހިދު އެކްސްގައި ކުރެއްވި ޕޯސްޓެއްގައި ވިދާޅުވީ، ހިސާން އަކީ އެޕާޓީއަށް މެދުކެނޑުމެއްނެތި ގިނަ ދުވަސްތަކެއް ވަންދެން ޚިދުމަތްކޮށްދެއްވަމުންގެންދަވާ ކަނބަލެއް ކަމަށާއި، އެކަމަނާ އެ މަގާމަށް ޢައްޔަނު ކުރުމަށް އެމްޑީޕީގެ ޤައުމީ މަޖިލީހުގެ ރުހުން އޮތްތޯ ބެލުމަށް އަސާސީ ގަވާއިދުގައި ވާގޮތުގެމަތިން މިއަދު ހުށަހަޅާފައިވާ ކަމަށެވެ.
ޝާހިދު ވިދާޅުވީ، ޕާޓީއަށާއި، ޕާޓީގެ މެމްބަރުންނަށް ކޮށްދެއްވާފައިވާ އިޚްލާސްތެރި ގިނަގުނަ ޚިދުމަތްތަކަށް ބަލާއިރު، ހިސާނަކީ މި މަޤާމަށް އެންމެ އެކަށީގެންވާ ބޭފުޅެއް ކަމަށާއި، އެމްޑީޕީގެ ލީޑަރޝިޕްގައި މިވަގުތު އަންހެން ބޭފުޅުން މަދުކަމާއެކު މި ނިންމުމުގައި އެކަމަށްވެސް ވިސްނުން ބަހައްޓާފައިވާނެކަމަށެވެ.
އެމްޑީޕީ ޤައުމީ މަޖިލީހުގެ މާލެ ދާއިރާގެ ރައީސްކަމަށް ކުރިމަތިލުމަށް ނިންމަވާފައިވާ ކަމަށް މާލެ ސިޓީ މޭޔަރު އާދަމް އާޒިމް ވެސް ވަނީ މީގެ ކުރިން ހާމަކުރައްވާފައެވެ.
އެމްޑީޕީގެ ޤައުމީ މަޖިލީހުގެ ހުސްވެފައިވާ މަޤާމުތަކަށް ކުރިމަތިލުމުގެ ފުރުޞަތު މި މަހުގެ 7 ވަނަ ދުވަހާއި ހިސާބަށް އެ ޕާޓީއިން ހުޅުވާލިއިރު، މި އިންތިހާބުގެ ބައި-އިލެކްޝަން އޮންނާނީ 2024 އޯގަސްޓް 2 ވާ ހުކުރު ދުވަހުއެވެ.
Advertisement
This content is created and paid for by advertisers and does not involve Voice Journalists
