އީ-ލަރނިން މޮޑަލިޓީގެ ދަށުން ކީރިތި ޤުރްއާނާއި ޤުރްއާނާއި ގުޅުން ހުރި ދާއިރާތައް ކިޔަވައިދިނުމުގެ ހުއްދަ މޯލްޑިވްސް ކޮލިފިކޭޝަންސް އޮތޯރިޓީ (އެމްކިއުއޭ) އިން ދީފިއެވެ. 

މިއަދު އެމްކިއުއޭއިން ނެރުނު އިޢުލާނެއްގަިއ ބުނެފައިވީ، 24 އޮގަސްޓް 2024ގައި އެ އޮތޯރިޓީއިން ގެޒެޓުގައި ޝާއިޢު ކުރި "ގައިޑްލައިންސް ފޮރ އީ-ލަރނިން" ގެ 11 ވަނަ މާއްދާގައި ބަޔާންކޮށްފައިވާ އީ-ލަރނިން މޮޑަލިޓީގެ ދަށުން ކުރިއަށް ނުގެންދެވޭނެ 8 ދާއިރާގެ ތެރޭގައި "ޤުރްއާނާއި ޤުރްއާނާ ގުޅުން ހުރި ދާއިރާތައް" ހިމެނޭ ކަމަށެވެ. 

ނަމަވެސް މިކަމާ ގުޅިގެން އެމްކިއުއޭ އާއި، އިސްލާމީ ކަންތައްތަކާ ބެހޭ ވުޒާރާއާ ބައްދަލުކޮށް ކުރި މަޝްވަރާގެ މަތިން، އީ-ލަރނިން މޮޑަލިޓީގެ ދަށުން ކީރިތި ޤުރްއާނާއި ޤުރްއާނާއި ގުޅުން ހުރި މާއްދާތައް ކިޔަވައިދިނުމުގެ ހުއްދަ ދެވިދާނެ ކަމަށް ބަޔާންކޮށް، އިސްލާމީ ކަންތައްތަކާ ބެހޭ ވުޒާރާއިން އެމްކިއުއޭއަށް އަންގާފައިވާ ކަމަށްވެސް އެމްކިއުއޭ ގެ އިޢުލާނުގައި ވެއެވެ. 

އެގޮތުން، ކިޔަވައިދިނުމުގައި އީ-ލަރނިން ޑެލިވަރީ މޮޑަލިޓީގައި، މަޢާނިލް ޤުރްއާނާއި ޢުލޫމުލް ޤުރްއާން ފަދަ މޮޑިއުލްތައް މިހާރުން މިހާރަށްވެސް ކިޔަވައިދޭން ފެށިދާނެ ކަމަށާއި ވަކި އުޞޫލެއްގެ މަތިން ތިލާވާ އަދި ޙިފްޡް ފަދަ މާއްދާތައް ކިޔަވައިދެވިދާނެ ކަމަށް އިސްލާމީ ކަންތައްތަކާ ބެހޭ ވުޒާރާގެ ބަޔާނާ ހަވާލާދީ އެމްކިއުއޭއިން ބުނެއެވެ.

މިގޮތަށް އީ-ލަރނިން މޮޑަލިޓީ ގެ ދަށުން ޕްރޮގްރާމްތައް ކުރިއަށް ގެންދަން ހުއްދަދީފައިވި ނަމަވެސް، ހުއްދަ ދީފައިވަނީ، އިމްތިޙާނުތައް ފޭސް-ޓު-ފޭސް ކޮށް ކުރިއަށް ގެންދާ ގޮތަށެވެ. 

އެހެންކަމުން، ޤުރްއާނާއި ޤުރްއާނާ ގުޅުންހުރި ދާއިރާތަކުގެ ޕްރޮގްރާމްތައް އީ-ލަރނިން މޮޑަލިޓީގެ ދަށުން ކިޔަވައިދިނުމަށް ބޭނުންވާ މަތީ ތައުލީމް ދޭ މަރުކަޒުތަކުން، އެ ޕްރޮގްރާމްތައް ފަރުމާކުރުމަށްފަހު އެމްކިއުއޭއަށް ހުށަހަޅަށް އެ އޮތޯރިޓީއިން ވަނީ އެދިފައެވެ. އަދި އެއްވެސް ޕްރޮގްރާމެއް އެ އޮތޯރިޓީގެ ހުއްދައާ ނުލައި، ކުރިއަށް ނުގެންދިޔުމަށް އެމްކިއުއޭއިން ވަނީ އަންގާފައެވެ.