ސޫރިޔާގެ ގޯލާންގެ އުސްބިންތަކުގައި ގާއިމު ކޮށްފައިވާ ޔަހޫދީ ފައުޖުގެ އަސްކަރީ މަރުކަޒަކަށް ލުބްނާންގެ ހިޒްބުﷲ ޖަމާއަތުން ވަރުގަދަ ހަމަލާތަކެއް ދީފިއެވެ.
ޣައްޒާ އަށް ޔަހޫދީން އަރައިގަތީންސުރެ، ހިޒްބުﷲ އިން ޔަހޫދީ ފައުޖަށް އަމާޒުކޮށް ހަމަލާތައް ކޮންމެ ދުވަހަކުހެން ދެމުންދާއިރު، މިއީ ޖޫލާންގެ އުސް ބިންތަކުގައި އޮތް ޔަހުދީންގެ އަސްކަރީ މަރުކަޒަކަށް އެ ޖަމާއަތުން ހަމަލާތައް އަމާޒުކުރި ފުރަތަމަ ފަހަރެވެ.
މި ހަމަލާ އާއި ގުޅޭގޮތުން ހިޒްބުﷲ އިން ބުނީ، މިއީ އެ ޖަމާއަތުން ވައިގެ މަގުން ދީފައިވާ އެންމެ ވަރުގަދަ ހަމަލާތައް ކަމަށާއި، މިހަމަލާތައް ކާމިޔާބު ކަމަާއި އެކު އަމާޒަށް ވާޒިލްވެފައިވާ ކަަމަށެވެ. އެގޮތުން ހިޒްބުﷲ އިން ވަނީ މި ހަމަލާގައި 200 ރޮކެޓުގެ އިތުރުން އެތަކެއް ޑްރޯންތަކެއް ވެސް ޔަހޫދީ ފައުޖަށް އަމާޒުކޮށް ފޮނުވާލާފައެވެ.
މި ހަމަލާތަކުގެ ސަބަބުން އެ ސަރަހައްދުގައި ތިބި ޔަހޫދީންނަށް ގެއްލުންލިބުނު ކަމަށާއި، އެ ސަރަހައްދުގައި އަލިފާން ރޯވިކަމަށް ވެސް ހިޒްބުﷲ އިން ބުނެއެވެ.
ޔަހޫދީން ސޫރިޔާ ގެ އެ ސަރަހައްދަށް ވެރިވެގަނެގެން ބިނާކުރި މި މަރުކަޒަކީ ސޫރިޔާގެ ވެރިރަށް ދިމިޝްޤާއި, ޢިރާޤާއި, އުދުރުނާއި ސަޢޫދީ ޢަރަބިއްޔާއަށް ޖާސޫސް ކޮށް، އެ ޤައުމުތަކާ ދެކޮޅަށް އަސްކަރީ ހަރަކާތްތައް ހިންގުމުގެ ބޭނުގައި ހިންގާ މަރުކަޒެކެވެ.
Advertisement
This content is created and paid for by advertisers and does not involve Voice Journalists
