ސަރުކާރުގެ އެހީގައި ރާއްޖެއާއި ރާއްޖެއިން ބޭރުގައި ކިޔަވާ ކުދިން ޙާލުގައި ނުޖައްސާނެކަމުގެ ޔަޤީންކަން މަތީ ތަޢުލީމާއި ތަމްރީނާއި ބެހޭ ވުޒާރާއިން ދީފިއެވެ.

ވުޒާރާއިން މިފަދައިން ބުނެފައިމިވަނީ، ރާއްޖެއިން ބޭރުގައި ސަރުކާރުގެ ސްކޮލާޝިޕާއި، ސްޓޫޑަންޓް ލޯނުގައި ތައުލީމު ފުރިހަމަ ކުރަމުން ދާ ދަރިވަރުންނަށް ފައިސާ ޖަމާ ނުކުރާކަމަށް ބުނެ ރައްޔިތުންގެ މަޖިލީހަށް އެމްޑީޕީން ކުއްލި މައްސަލައެއް ވެސް ހުށަހަޅާފައިވަނިކޮށެވެ.

އެ ވުޒާރާއިން އާއްމު ކުރި ލިޔުމެއްގައި ބުނީ،  ސަރުކާރުން އެހީ ފޯރުކޮށްދީގެން، ރާއްޖެ އާއި ރާއްޖޭން ބޭރުގައި 2163 ދަރިވަރަކު މި ވަގުތު ކިޔަވަމުންދާ ކަމަށާއި، މި ދަރިވަރުންގެ ކޯސްފީއާއި ލިވިންގ އެލައުންސާއި އެހެނިހެން ޚަރަދުތައް ހަމަޖެހިފައިވާ އުޞޫލުން، ކަނޑައެޅިފައިވާ މުއްދަތައް ބަރާބަރަށް، ދެއްކުމަކީ މި މިނިސްޓްރީން އަބަދުވެސް ކުރަމުން އަންނަ ކަމެއް ކަމަށެވެ.

Advertisement

އެހެންނަމަވެސް، ބައެއްފަހަރު ބައެއް ޕޭމަންޓްތައް ޖަމާވުމުގައި ލަސްތަކެއްވާކަމަށް ޤަބޫލުކުރާ ކަމަށާއި، އެއީ ހަމައެކަނި މިހާރުވަމުންދާ ކަމެއް ނޫންކަމަށް ވެސް އެވުޒާރާއިން ބުނެއެވެ. 

މީގެ ކުރިން ވެސް މިފަދަ ޙާލަތްތައް މެދުވެރިވެފައި ހުރިކަން ފާހަގަކުރަމުން އެ ވުޒާރާއިން ބުނީ،  ޢާއްމުކޮށް ޕޭމަންޓްތައް ލަސްވުމުގައި ދިމާވާ މައިގަނޑު ސަބަބަކީ ކަނޑައެޅިފައިވާ ވަގުތަށް، އެ ވުޒާރާއަށް ލިބެންޖެހޭ ލިޔެކިއުންތައް ލަހުން ލިބުމާއި ދަރިވަރު ކިޔަވަމުން ދާކަން، ޔުނިވަރސިޓީން ނުވަތަ ކޮލެޖުން ކަށަވަރު ކުރުމުގައި ވަގުތު ނަގާތީ ކަމަށެވެ.

މަތީ ތައުލީމާއި ބެހޭ ވުޒާރާއިން ބުނީ،  ފޯރުކޮށްދޭންޖެހޭ މިފަދަ ޚިދުމަތްތަށް އޮޓެމޭޓްކޮށް، ކުދިން ކިޔަވަމުންދާކަން ވެރިފައިކުރަން އޮންނަ ޕްރޮސެސް، މިއަށްވުރެ ހަލުވިކޮށް، އެކުދިންނަށް ދެވޭ ޚިދުމަތުގެ އެފިޝެންސީ އިތުރުކުރެވޭނެ ގޮތްތަށް ހޯދުމުގެ މަސައްކަތް ކުރަމުން އަންނަ ކަމަށާއި، ރާއްޖެއާއި ރާއްޖެއިން ބޭރުގައި ކިޔަވަމުންދާ އެންމެހައި ދަރިވަރުންގެ ކިޔެވުމަށް ބުރޫއަރާފަދަ ކަމެއް މެދިވެރިވިޔަ ނުދިނުމަށްށް، ކުރެވެންއޮތް ކޮންމެ ކަމެއް ދިވެހިސަރުކާރުން ކުރާނެ ކަމަށެވެ.

 ސަރުކާރުން އަބަދުވެސް އިސްކަންދޭނީ ދިވެހި ދަރިން ހެޔޮގޮތުގައި ބިނާކޮށް، މި ޤައުމު އާރާސްތުކުރުމުގައި އެ ދަރިންގެ ޙިއްޞާ އިތުރު ކުރުމަށް ކަމަށް ވެސް އެ ވުޒާރާއިން ބުނެއެވެ.

އެހެންކަމުން، މިކަމާއި ގުޅުވައިގެން  ޙަޤީޤަތް އޮޅޭފަދަ ގޮތަކަށް، ރާއްޖޭގެ ބައެއް މީޑިއާތަކުން ޚަބަރުތައް ގެނެސްދިނުމަކީ އެ ވުޒާރާއިން ކަންބޮޑުވެ، ހިތާމަ ކުރާކަމަށް ބުނެ، އެ ވުޒާރާއިން ވަނީ ދަރިވަރުންގެ ކަންކަމާއި ގުޅުވައިގެން ޢާންމުންގެ ހިތްތަކުގައި ނުތަނަވަސްކަން އުފެދޭގޮތަށް، ޚަބަރު ފަތުރާ ވަސީލަތްތަކުން ޢަމަލު ނުކުރުމަށް އިލްތިމާސްކޮށްފައެވެ.