އީރާނަކީ އަބަދުވެސް ޔަހޫދީ ދައުލަތާއި ދެކޮޅުވާނެ ގައުމެއް ކަމަށް އީރާނުގެ އިންތިހާބީ ރައީސް މަސްއޫދު ޕެޒެޝްކިއަން ވިދާޅުވެއްޖެއެވެ.

ލުބުނާންގެ ހިޒްބުﷲ ޖަމާއަތުގެ ލީޑަރު، ހަސަން ނަސްރުﷲ އަށް ފޮނުއްވި މެސެޖެއްގައި ޕެޒެޝްކިއަން ވިދާޅުވީ، ޔަހޫދީން ޣައްޒާގެ ރައްޔިތުންނަށް ދެމުންގެންދާ ލާއިންސާނީ ހަމަލާތައް ކުރިއަށް ގެންދިޔުމުގެ ފުރުސަތު ނުދޭނެ ކަމަށާއި، އީރާނުން އަބަދުވެސް ތާއީދުކޮށްފައިވަނީ ޣައިރު ޤާނޫނީ ޒަޔޯނިސްޓު ވެރިކަމާ ދެކޮޅަށް ކަމަށެވެ.

މީގެ އިތުރުންވެސް، ފަލަސްޠީނުގެ އަނިޔާ ލިބެމުންދާ މުސްލިމުންނާއި އެ ސަރަހައްދުގެ އެހެން ޤައުމުތަކުގެ މައްޗަށް ޔަހޫދީން ހިންގަމުންދާ ހަނގުރާމަވެރި ސިޔާސަތުތައް ކުރިއަށް ގެންދިއުމުގެ ފުރުސަތު އީރާނުން ނުދޭނެކަމަށް ޕެޒެޝްކިއަން ވިދާޅުވިކަމަށްވެސް އީރާނުގެ މީޑިއާތަކުން ރިޕޯޓްކުރެއެވެ.

Advertisement

އެންމެ ފަހުން އީރާނުގެ ރައީސް ކަމުގައި ހުންނަވަނިކޮށް، ދަތުރުކުރައްވަމުން ގެންދެވި ހެލިކޮޕްޓަރު ވެއްޓި މެއި މަހު ހިނގި ހާދިސާއެއްގައި އަވަހާރަވި އިބްރާހިމް ރައިސީ އަކީ ވެސް ޔަހޫދީންގެ ޣައިރު ގާނޫނީ ދައުލަތް، އިސްރާއީލާއި ދެކޮޅަށް ވަރުގަދަ އިންޒާރުތަކެއް ދެއްވި ބޭފުޅެކެވެ. ރައީސީގެ ވެރިކަމުގައި އީރާނުން އިސްރާއީލަށް އަމާޒުކޮށް ވަރުގަދަ ހަމަލާތަކެއް ފޮނުވާލިކަން ވެސް ފާހަގަކޮށްލަން ޖެހެއެވެ.