ނޭޕާލްގެ ބޮޑުވަޒީރު،ޕުޝްޕަ ކަމާލް ދަހަލްގެ އިތުބާރު ނެތްކަމަށް އެގައުމުގެ ޕާލިމެންޓުން ފާސްކޮށްފިއެވެ.

ދަހަލްގެ އިތުބާރު ނެތްކަމުގެ ވޯޓްނެގިފައިވަނީ ދަހަލްގެ ސަރުކާރުގެ މައިގަނޑު ބައިވެރިއެއްކަމުގައިވާ ނޭޕާލްގެ ކޮމިއުނިސްޓް ޕާޓީ (ޔުނައިޓެޑް މާކްސިސްޓް ލެނިނިސްޓް) އިން ފާއިތުވި ހަފްތާގައި ސަރުކާރަށް ދެމުންއައި ތާއީދު އަނބުރާ ގެންގޮސް، ޤައުމުގެ އެންމެ ބޮޑު ޕާޓީކަމުގައިވާ ނޭޕާލީ ކޮންގްރެސްއާ ގުޅިގެން އައު ކޯލިޝަނެއް އުފެއްދުމަށް ނިންމުމާ ގުޅިގެންނެވެ.

މިކަމުގެ ސަބަބުން 19 މަސްދުވަހު ވެރިކަމުގައި ހުރުމަށްފަހު އޭނާ މަޤާމުން ވަކިވާން ޖެހުނުއިރު، ހުކުރު ދުވަހު ނެގި ވޯޓްގައި ޕާލިމެންޓުގެ ސްޕީކަރު ދޭވް ރާޖް ގިމިރޭ އިޢުލާނުކުރެއްވި ގޮތުގައި އޭނާއަށް ލިބުނީ އެންމެ 63 ވޯޓެވެ. އަދި 194 މެންބަރުން ވޯޓުދިނީ އޭނާއާ ދެކޮޅަށެވެ.

މިއާއިއެކު އޭނާ ވާނީ އައު ސަރުކާރެއް އުފެދެންދެން ނޭޕާލު ސަރުކާރުގެ ވަގުތީ އިސްވެރިޔަކަށެވެ. ޕާލިމެންޓުގެ ނިންމުން ރަސްމީކޮށް އެންގުމުން، ނޭޕާލްގެ ރައީސް ރާމް ޗަންދްރަ ޕައުޑެލް އައު ސަރުކާރެއް އުފެއްދުމަށް ހުށަހެޅުންތައް ހުށަހެޅުމަށް ސިޔާސީ ޕާޓީތަކަށް އަންގަވާނެއެވެ.

އެ ޕާޓީއާއި ދަހަލްއާއި މެދު މާ ބޮޑު މައްސަލަތަކެއް ނުޖެހުނު ނަމަވެސް، އެ ޕާޓީގެ ލީޑަރު އޯލީއަށް ނޭޕާލީ ކޮންގްރެސްއިން ހުށަހެޅި ހުށަހެޅުމެއްގައި ބުނެފައިވަނީ އައު ކޯލިޝަނެއް އުފައްދައިފިނަމަ އޭނާއަށް ވެރިކަން ލިބޭނެ ކަމަށެވެ. ދަހަލްގެ ސަރުކާރު ވެއްޓުނީ އޯލީ މި ހުށަހެޅުން ގަބޫލުކުރުމާއި ގުޅިގެންނެވެ.