ހ.ހުދުފިނިފެންމާގެ މީހުން ނުކުމެހަދާނެ ގޮތެއް ހަމަޖައްސަން 4 ހަފްތާދިންކަމަށް މާލެ ސިޓީ ކައުންސިލްގެ ވަކީލު އަބުދުލް ހަކީމް ވިދާޅުވެއްޖެއެވެ.

ހުދުފިނިފެންމާގެއަށް ވަދެނުކުމެ ނުހެދޭގޮތަށް ފާރެއް ރޭނުމުން އެ ގޭގައި އާއިލާއެއް ތާށިވުމާއި ގުޅިގެން އެކަން ހިނގިގޮތް ސާފުކޮށްދިނުމަށްޓަކައި މާލެ ސިޓީ ކައުންސިލުން ބޭއްވި ނޫސްވެރިންގެ ބައްދަލުވުމެއްގައި ހަކީމް ވިދާޅުވީ، ހުދުފިނިގެންމާގެ އާގޭގެ އިންފާރު ރޭނުމަށް ހުއްދަދީ، އިންފާރު ރާނަން ފެށުމުގެ ކުރިން، ހުދުފިނިގެންމާގެ އާގެ އިންފާރުގެ ތެރެއަށް ހުދުފިނިފެންމާގޭގެ މީހުން ވަދެނިކުމެވާތީ އެގޭގެ މީހުން ޝަކުވާ ކުރާ ކަމަށް އެގެއަށް އެންގި ކަމަށެވެ.

އެގޮތަށް ޝަކުވާކުރާނަމަ އެކަން ހުއްޓުވަން ޖެހޭތީ، އެކަމާއި ގުޅިގެން ހުދުފިނިގެންމާގެ އާގެ ތެރެއަށް ވަދެ ނުކުތުން ހުއްޓާލުމަށް އަންގައި އެގޭގެ ވެރިފަރާތް ހައްވާ އިބްރާހިމަށް މާލެ ސިޓީ ކައުންސިލުން ސިޓީއެއް ފޮނުވި ކަމަށެވެ.

Advertisement

މީހެއްގެ އިންފާރު ރޭނުން މަނާނުކުރެވޭނެކަން ފާހަގަކުރައްވަމުން ހަކީމް ވިދާޅުވީ، އިންފާރު ރާނަން ފެށުމުން ހުދުފިނިފެންމާގޭގެ މީހުން ޝަކުވާކުރިކަމަށާއި، އެކަމާއި ގުޅިގެން އެގޭގެ މީހުން ނުކުންނާނެ ގޮތެއް ހަމަޖެއްސުމަށް ފުލުހުންގެ މެދުވެރިވެގެން 4 ހަފްތާގެ މުހުލަތެއް ދިން ކަމަށެވެ. އެހެންނަމަވެސް، އެމީހުން ވަދެނިކުންނާނެ ގޮތެއް ހަމަނުޖައްސައި އޮތްކަން އެނގުނީ މައްސަލަ ދިމާވުމުން ކަމަށްވެސް ހަކީމް ވިދާޅުވިއެވެ.

ހަކީމް ވިދާޅުވީ، ހުދުފިނިފެންމާގޭގެ ގޯޅީގެ މައްސަލަ ހުށަހެޅިގެން އުޅޭތާ 27 އަހަރު ވެފައިވާ ކަމަށާއި، ހުދުފިނެފެންމާގޭގެ ބޮޑު މިނަކީ 3970 އަކަފޫޓްކަމަށް ވާއިރު، ކޮންމެ ބަޔަކަށް 1985 އަކަފޫޓް ހިމެނޭ ގޮތަށް ގޯތި ދެބައި ކުރި ކަމަށެވެ.އެތަނުން އެއްބަޔަށް ހުދުފިނިފެންމާގެ އަދި އަނެއްބަޔަށް ހުދުފިނިގެންމާގެ އާގެ ވަނީ ކިޔާފައެވެ.

އޭގެ ތެރެއިން ހުދުފިނިފެންމާގެ އަނެއްކާވެސް ދެބައި ކުރި ކަމަށާއި، އެއްބަޔަށް ކިޔަނީ ފުގުރާ އަދި އަނެއްބަޔަށް ކިޔާފައިވަނީ ހުދުފިނިފެންމާގެ ކަމަށާއި، ދެ ބަޔަށް ވެސް ވަދެވޭ ގޮތަށް އިނީ ހަދީބީ މަގުން ކަމަށް ހަކީމް ވިދާޅުވިއެވެ.

ހަކީމް ވިދާޅުވީ، ހުދުފިނިފެންމާގެ ހަސަން ޝާކިރު އާއި ހައްވާ އިބްރާހިމް އަށް ދެބައި ކޮށްފައި އޮއްވާ ހައްވާ އިބްރާހިމް އަށް ނުވަދެވޭގޮތަށް ގޯޅިއެއް ނުކަނޑާ އެތަން ރަޖިސްޓްރީ ކުރިކަމަށެވެ. މާލެ ސިޓީ ކައުންސިލުން 2020 ވަނަ އަހަރު  ވަކި ރަޖިސްޓްރީއެއް ހަދާފައި އޮތް އިރު އެ ރަޖިސްޓްރީގެ ސަބަބުން ހުދުފިނިގެންމާގޭގެ ފަހަތުގައި އޮތް ބަޔަށް ނުވަދެވޭގޮތްވީ ކަމަށް ވެސް ހަކީމް ވިދާޅުވިއެވެ.

ހަކީމް އިތުރަށް ވިދާޅުވީ، ހުދުފިނިފެންމާގެ އާގޭގެ އިންފާރު ރޭނުމާއި ގުޅިގެން ހައްވާ އިބްރާހިމްގެ ބައިން ނުކުންނަން ޖެހޭނީ ހުދުފިނިގެންމާގެ ހަސަން ޝާކިރުގެ ބައިން ގޯޅިއެއް ހަދައިގެން ކަމަށާއި، މި މައްސަލަ ކުރިމަތިވީ ގޯޅި ހަދާފައި ނެތުމުގެ ސަބަބުން ކަމަށެވެ.