ކައުންސިލްތަކުގެ މެދު ރާސްތާ ބަޖެޓު ތައްޔާރުކޮށް ހުށަހެޅުމަށް މާލީ ވުޒާރާއިން އެދެފިއެވެ.

މާލީ ވަޒީރު ޑރ. މުޙައްމަދު ޝަފީޤު ސޮއިކުރައްވައި ނެރުއްވި ސާކިއުލާގައި އެ ވުޒާރާއިން ވަނީ  2025 އިން 2027 ވަނަ އަހަރަށް ލަފާކުރާ ކައުންސިލްތަކުގެ މެދުރާސްތާ ބަޖެޓުގެ މައުލޫމާތު ހިއްސާކުރުމަށް އެދިފައެވެ.

އެ ސާކިއުލާގައިވާގޮތުން، ދައުލަތުގެ މާލިއްޔަތުގެ ޤާނޫނުގެ 4 ވަނަ ބާބުގެ ދަށުން، މާލީ ވުޒާރާއިން ދައުލަތުގެ އަހަރީ ބަޖެޓު ތައްޔާރުކޮށް، ބަޖެޓު އެކުލަވާލެވޭ މާލީ އަހަރު ފެށުމުގެ 2 މަސް ދުވަސް ކުރިން ރައްޔިތުންގެ މަޖިލީހަށް ހުށަހަޅަންޖެހެއެވެ.

Advertisement

ހަމައެއާއިއެކު، އެ ވުޒާރާއިން ބުނީ، "ކައުންސިލްތަކަށް ދޭ ހިލޭ އެހީ ކަނޑައެޅުމާއި، ކައުންސިލްތަކުގެ ބަޖެޓު ތައްޔާރުކުރުމާއި، ބަޖެޓު ތަންފީޒުކުރުމުގައި ޢަމަލުކުރާނެގޮތުގެ އުޞޫލު" އާއި އެއްގޮތްވާގޮތުގެ މަތިން ކައުންސިލްތަކުން މެދުރާސްތާ ބަޖެޓު ތައްޔާރުކޮށް އެ ވުޒާރާއަށް ހުށަހަޅަން ޖެހޭ ކަމަށެވެ.

ބަޖެޓާއި ގުޅޭ މައުލޫމާތުތައް ހިއްސާކުރާނީ އެ ސާކިއުލާގައިވާ ފޯމެޓުތަކާއި އެއްގޮތަށްކަމަށާއި، ކައުންސިލްތަކުން ބަޖެޓު ތައްޔާރުކުރާއިރު ފަންޑުތަކުގެ އާމްދަނީއާއި ޚަރަދު ވަކިން އެނގެން އޮންނަންވާނެކަމަށް މާލީ ވުޒާރާއިން ވިދާޅުވިއެވެ.

އޭގެ ތެރޭގައި ހިމެނެނީ: 

1) ދައުލަތުގެ ބްލޮކް ގްރާންޓުގެ ގޮތުގައި ދޭ ހިލޭ އެހީ

2) ސަރުކާރުގެ އިދާރާތަކުން ކޮންޑިޝަނަލް ގްރާންޓުގެ ގޮތުގައި ދޭ ހިލޭ އެހީ

3)ކައުންސިލްތަކުގެ ޓްރަސްޓް ފަންޑް

4)ކައުންސިލްތަކަށް ލިބޭ އިތުރު އާމްދަނީ  

މަތީގައިވާ ފަންޑުތަކުގެ ތެރެއިން، ކައުންސިލްތަކަށް ދައުލަތުން ބްލޮކް ގްރާންޓުގެ ގޮތުގައި ދޭ ހިލޭ އެހީގެ ބަޖެޓު ތައްޔާރުކުރަންވާނީ 2024 ވަނަ އަހަރުގެ މެދު ރާސްތާ ބަޖެޓާއި 2025 ވަނަ އަހަރުގެ ފިސްކަލް ސްޓްރެޓެޖީގައި ކައުންސިލްތަކަށް ބްލޮކް ގްރާންޓުގެ ގޮތުގައި ދިނުމަށް ލަފާކޮށްފައިވާ އަދަދުތަކަށްވުރެ އިތުރުނުވާނެގޮތަކަށްކަމަށާއި، މި އަދަދުތައް 2025 ވަނަ އަހަރުގެ މެދުރާސްޓާ ބަޖެޓުގައި މުރާޖައާކުރެވޭނެކަމަށް ވެސް އެވުޒާރާއިން ބުނެއެވެ.

އެހެންކަމުން، ރާއްޖޭގެ ހުރިހާ ކައުންސިލަކުންވެސް އެ ވުޒާރާއިން ނެރުނު ސާކިއުލާ އާއި އެއްގޮތްވާ ގޮތުގެ މަތިން، 2025 އިން 2027 އަށް ލަފާކުރާ ބަޖެޓު 19 ސެޕްޓެންބަރު 2024 ގެ ކުރިން ހުށަހެޅުމަށް އެ ވުޒާރާއިން ވަނީ އެދިފައެވެ.