ރާއްޖޭގައި ގަވާއިދާއި ހިލާފަށް އުޅެމުންދާ ބިދޭސީންގެ މައްސަލައަށް ހައްލެއް ގެނައުމުގެ ގޮތުން، މިދިޔަ އަހަރުގެ ނޮވެންބަރު މަހުގެ 17 ވަނަ ދުވަހުން ފެށިގެން މިއަހަރު ޖުލައި މަހުގެ 11 ވަނަ ދުވަހާއި ހަމައަށް ޖުމްލަ 2013 ބިދޭސީން ރާއްޖެއިން ފޮނުވާލާފައިވާކަމަށް މޯލްޑިވްސް އިމިގްރޭޝަންގެ ކޮންޓްރޯލަރ މުހައްމަދު ޝަމްއާން ވަހީދު ވިދާޅުވެއްޖެއެވެ.
ދާޚިލީ ސަލާމަތާއި ފަންނިއްޔާތާއި ބެހޭ ވުޒާރާއިން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ޝަމްއާން ވިދާޅުވީ، މިހާތަނަށް ފޮނުވާލި ބިދޭސީންގެ ތެރޭގައި އެކި ރަށްރަށުން ސީރިއަސް މައްސަލަތަކަށް ތުހުމަތުކުރެވުނު ބިދޭސީން ވެސް ހިމެނޭ ކަމަށެވެ.
ގަވާއިދާއި ޚިލާފަށް ރާއްޖޭގައި ވިޔަފާރި ކުރަމުންއަންނަ ބިދޭސީން ހޯދުމުގެ މަސައްކަތްވެސް އިމިގްރޭޝަނުން ކުރަމުން އަންނައިރު، އެކަމާއި ގުޅިގެން ޝަމްއާން ވިދާޅުވީ، އެކަމާއި ގުޅިގެން މިހާތަނަށް 120 ބިދޭސީން އިމިގްރޭޝަންގެ ބެލުމުގެ ދަށަށް ގެނެސްފައި ކަމަށެވެ.
މިމީހުން ރާއްޖޭން ފޮނުވާލުމުގެ މަސައްކަތް ކުރެވެމުންދާ ކަމަށް ވެސް ކޮންޓްރޯލަރ ވިދާޅުވިއެވެ.
"މީގެ ތެރޭގައިވެސް އަޅުގަނޑުމެންނަށް 120 ފަރާތެއް ވަނީ އިމިގްރޭޝަންގެ ބެލުމުގެ ދަށަށް ގެނެވި، މި ފަރާތްތައް ރާއްޖެއިން ފުރުވާލުމުގެ މަސައްކަތްދަނީ މިހާރު ކުރެވެމުން."
ޝަމްއާން ވިދާޅުވިއެވެ.
ގަވައިދާ ހިލާފަށް ވިޔަފާރި ކުރާ ބިދޭސީން ހޯދުމަށް އިމިގްރޭޝަނާއި، ފުލުހުން ގުޅިގެން ހިންގާ އޮޕަރޭޝަނުގެ ތެރެއިން، ރޭ ވެސް ވަނީ ގަވާއިދާ ހިލާފަށް ވިޔަފާރި ކުރަމުންދިޔަ އިތުރު 7 ބިދޭސީން ހައްޔަރުކޮށް، ކެފޭއެއް ބަންދުކޮށްފައެވެ.
Advertisement
This content is created and paid for by advertisers and does not involve Voice Journalists
