ޖެންޑާ މިނިސްޓްރީގެ ކުރީގެ ސްޓޭޓް މިނިސްޓަރު ޒިފްލީނާ ހަސަން ތިން މިލިއަނަށް ވުރެ ގިނަ ރުފިޔާގެ ފްލެޓެއް ބައްލަވައިގަތް މައްސަލަ، ބަލައިދޭން ދިވެހި ފުލުހުންގެ ޚިދުމަތުން, އެންޓި ކޮރަޕްޝަން ކޮމިޝަން, އޭސީސީއަށް ހުށަހަޅައިފިއެވެ. 

ޒިފްލީނާ، ހުޅުމާލެ އިން ބައްލަވައިގަތީ އެފްޑަބްލިއު ރެސިޑެންސްގެ 1،200 އަކަފޫޓުގެ ފްލެޓެކެވެ. އެ ފްލެޓް ބައްލަވައިގަތީ 3.5 މިލިއަން ރުފިޔާ އަށެވެ. 

ފުލުހުންގެ ތަރުޖަމާނު އަޙްމަދު ޝިފާން, ހާމަ ކުރެއްވި ގޮތުގައި، ޒިފްލީނާ ފްލެޓް ގަތް މައްސަލައިގައި ކޮރަޕްޝަން ހިމެނޭ ކަަމަށް މީހަކު ވަނީ ފުލުހުންނަށް ހުށަހަޅާފައެވެ. އަދި އެހެންކަމުން, އެކަން އިތުރަށް ތަޙްޤީގު ކުރުމަށް ވަނީ އޭސީސީއަށް ފޮނުވާފައެވެ.

ފްލެޓްގެ އަގަށްވާ ފައިސާ ޒިފްލީނާގެ ފަރާތުން ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އަށް އެއްކޮށް ދައްކާފައިވާތީ އެ ފްލެޓް އޭނާއަށް މިލްކުވެފައިވާ ކަމަށް، ސިވިލް ކޯޓޫން ޙުކުމް ކުރުމާއެކު، މިކަން ވަނީ، ޢާންމުންގެ ސަމާލުކަމަށް އައިސްފައެވެ. އަދި މިކަމާ ގުޅިގެން، ޢާންމުން ވަނީ މީސްމީޑިޔާގައި ފާޑުކިޔާ، ކޮރަޕްޝަން ހިމެނޭ ކަމަށް ތުހުމަތު ކޮށްފައެވެ.

މިކަމާ ގުޅިގެން، އިއްޔެ، ޒިފްލީނާ ވަނީ ފޭސްބުކްގައި ޕޯސްޓެއް ކުރައްވާ މި ވާހަކަތަކަށް ރައްދުދެއްވާފައެވެ. އެގޮތުން ޒިފްލީނާ ވިދާޅުވީ އޭނާ އެޕާޓްމަންޓް ގަނެފައި ވާނީ ސްޓޭޓް މިނިސްޓަރުގެ މަގާމް ލިބިވަޑައިގަތުމުގެވެސް ކުރިން ކަމަށާއި އަދި މަގާމާ ހަވާލުވެ، ސްޓޭޓް މިނިސްޓަރުން ހާމަކުރަން ޖެހޭ އެސެޓް ޑިކްލަރޭޝަން ފޯމުގައި ވެސް އެޕާޓްމަންޓްގެ މައުލޫމާތު ހިމަނާފައިވާނެ ކަމަށެވެ.