'ޒުވާން ޚަޠީބުން' ޕްރޮގްރާމުގެ ދެވަނަ ބުރުގެ އިމްތިހާން ފަށައިފިއެވެ.

އިސްލާމީ ކަންތައްތަކާއި ބެހޭ ވުޒާރާއިން ބުނީ، ދެވަނަ ބުރުގައި ބައިވެރިވި ފަރާތްތަކުގެ ބަސްދީގަތުންތައް މާލޭގައި ފަށާފައިވާ ކަމަށާއި، މިފަހަރު މާލޭގެ އިތުރުން މި އިމްތިހާނުތައް އައްޑޫ ސިޓީއާއި މުލަކަތޮޅުގައި ބާއްވާ ގޮތަށް ހަމަޖެހިފައިވާ ކަމަށެވެ.

ޖުމްލަ 206 ފަރާތަކުން 'ޒުވާން ޚަޠީބުން' ޕްރޮގްރާމުގެ ދެވަނަ ބުރުގައި ބައިވެރިވާން އެދި އެޕްލިކޭޝަން ހުށަހަޅާފައިވާއިރު، އެ ވުޒާރާއިން ބުނީ،  މި އިމްތިހާނުން ފާސްވާ ފަރާތްތަކަށް ބާއްވާ ތަމްރީނު ބައްދަލުވުން މި މަހު ބާއްވާ ގޮތަށް ހަމަޖެހިފައިވާ ކަމަށެވެ.

'ޒުވާން ޚަޠީބުން' ޕްރޮގްރާމަކީ ގްރޭޑް 10، 11 އަދި 12 ގައި އުޅޭ ދަރިވަރުންނަށާއި ސްކޫލް ނިމިފައިވާ ދަރިވަރުންނަށް ހުކުރުކުރުމުގެ ހުއްދަ ދިނުމަށް ޓަކައި ރައީސް ޑރ. މުހައްމަދު މުޢިއްޒުގެ އިރުޝާދުގެ ދަށުން އިސްލާމީ ކަންތައްތަކާ ބެހޭ ވުޒާރާއިން ކުރިއަށް ގެންދާ ޕްރޮގްރާމެކެވެ.

ޒުވާން ޚަޠީބުން ތަމްރީންކުރުމުގެ ފުރަތަމަ ބުރުގައި 100 އަށް ވުރެ ގިނަ ކުދީން ސަނަދު ހާސިލްކޮށްފައިވާއިރު، މި ޕްރޮގްރާމްގެ ތެރެއިން ޚަތީބުންނަށް ޚުތުބާ ކިޔުމާއި އިމާމުވެ ނަމާދުކުރުމާއި ދީނާ ގުޅުން ހުރި އެހެން ބައެއް ދާއިރާތަކުން ޚާއްޞަ ތަމްރީނުތަކެއް ދެވޭނެއެވެ.

 މި ޕްރޮގްރާމްގެ ސަބަބުން ޚަޠީބުން މަދު ރަށްރަށުގެ ކައުންސިލްތަކަށް ވެސް ބޮޑު ލުއިފަސޭހައެއް ލިބިފައިވާ ކަމަށް އިސްލާމީ ކަންތައްތަކާއި ބެހޭ ވުޒާރާއިން ހާމަކުރެއެވެ.