ނޭޕާލުގެ ބޮޑު ވަޒީރުކަމަށް އެގައުމުގެ ކޮމިއުނިސްޓް ޕާޓީ (ޔުނިފައިޑް މާކްސިސްޓް-ލެނިނިސްޓް) ޕާޓީއަށް ނިސްބަތްވެވަޑައިގަންނަވާ  ކޭޕީ ޝަރުމާ އޯލީ އައްޔަނުކޮށްފިއެވެ.

ނޭޕާލުގެ ރައީސް ރާމްޗަންދްރާ ޕައުޑެލް އޯލީ ބޮޑޫ ވަޒީރުކަމުގެ ހަތަރުވަނަ ދައުރަކަށް އައްޔަނުކޮށްފައިމިވަނީ އެމަގާމުގައި ކުރިން ހުންނެވި ޕުޝްޕަ ކަމާލް ދަހަލްގެ އިތުބާރު ނެތްކަމަށް އެގައުމުގެ ޕާލިމެންޓުން ފާސްކުރުމާއި ގުޅިގެންނެވެ.

އުމުރުފުޅުން 72 އަހަރުގެ އޯލީ މީގެ ކުރިން 2015-2016 އަށް ބޮޑުވަޒީރުކަން ކުރެއްވިއިރު، ފެބްރުއަރީ 2018 އިން ފެށިގެން ޖުލައި 2021 އަށް ވެސް ވަނީ ވަކި ދެ ދައުރެއްގައި ނޭޕާލުގެ ބޮޑުވަޒީރުކަމުގެ މަގާމު އަދާކުރައްވާފައެވެ.

Advertisement

ނޭޕާލުގެ 275 މެންބަރުންގެ މަޖިލީހުގައި ސަރުކާރެއް އުފެއްދުމަށް ބޭނުންވާ އެންމެ މަދު ގޮނޑީގެ އަދަދަކީ 138 ކަމަށްވާއިރު، އޯލީއަށް މި މަޤާމު ލިބިވަޑައިގަތީ 166 މެންބަރުންގެ ތާއީދާއެކުއެވެ. އޭގެ ތެރޭގައި ނޭޕާލީ ކޮންގްރެސްގެ 88 މެންބަރުންނާއި ޔޫއެމްއެލްގެ 78 މެންބަރުން ހިމެނެއެވެ.

އޯލީއާއި އޭނާގެ ކެބިނެޓް ވަޒީރުން ހުވާކުރައްވާނީ ހޯމަ ދުވަހުއެވެ. އެޤައުމުގެ ޤާނޫނުއަސާސީ ބުނާގޮތުން، ބޮޑުވަޒީރުކަމަށް އޯލީ އައްޔަންކުރެވޭތާ 30 ދުވަހުގެ ތެރޭގައި ޕާލިމެންޓުން އެބޭފުޅާގެ އިތުބާރުގެ ވޯޓެއް ހޯއްދަވަންޖެހޭނެއެވެ.