Niyaiy ganefiyya rajje ah hathiyaaru geneveyne magu othee hulhuvifai: Customs

ނިޔަތް ގަނެފިއްޔާ ރާއްޖެ އަށް ހަތިޔާރު ގެނެވޭނެ މަގު އޮތީ ހުޅުވިފައި: ކަސްޓަމްސް

16 Jul 2024 | 13:14

ކަސްޓަމްސްގެ ބޭފުޅުން-- ފޮޓޯ: މިހާރު

ރާއްޖެއަށް ހަތިޔާރު އެތެރެކުރަން ބޭނުންވާ މީހަކަށް އެކަން ކުރުމުގެ މަގު ހުޅުވިފައިވާކަމަށް ކަސްޓަމްސް އިން ބުނެފިއެވެ.

ރައްޔިތުންގެ މަޖިލީހުގެ ސަލާމަތީ ޚިދުމަތްތަކާއި ބެހޭ ކޮމެޓީ (241 ކޮމެޓީ) ގެ ބައްދަލުވުމުގައި މައުލޫމާތު ދެއްވަމުން ކަސްޓަމްސްގެ ޑެޕިއުޓީ ޗީފް ސްޕްރިންޓެންޑެންޓް އަހްމަދު ސިމާހް، ރާއްޖޭގެ އިގްތިޞާދީ ސަރަހައްދަކީ ވަރަށް ބޮޑު ސަރަހައްދެއްކަން ފާހަގަކުރައްވަމުން ވިދާޅުވީ، ބޭރުގެ އުޅަނދެއް ބަނދަރާއި ހަމައަށް އައުމުގެ ކުރިންވެސް އެތައްކަމެއް ކުރުމުގެ ފުރުސަތު އޮންނަ ކަމަށެވެ.

ސިމާހް ވިދާޅުވީ، އެ އުޅަނދަކުން ގެންނަނީ ކޯއްޗެއްތޯ ކަސްޓަމްސް އަށް ބެލެނީ އޭތި ބަނދަރު ކުރުމުންކަމަށާއި، އޭގެ ކުރިން އެ ބޯޓު ދަތުރުކުރަމުން އަންނަނީ ހުޅުވިފައި އޮތް ކަނޑަކުންކަމަށްވާތީ، ލޯކަލް އުޅަނދުތަކުގައި ގެންދާގޮތަށް ބޭނުން އެއްޗެއް ގެނެވޭނެ ކަމަށެވެ.

"އެމީހަކު ނިޔަތް ގަންނަ ކަމެއް، މިސާލަކަށް ހަތިޔާރު ގެންނަން މީހަކު ނިޔަތް ނުގަންނަނީ، ނިޔަތް ގަނެފިއްޔާ ރާއްޖެއަށް ހަތިޔާރު ގެނައުމުގެ މަގު އޮތީ ހުޅުވިފައި،"

ސިމާހް ވިދާޅުވިއެވެ.

ބަނދަރާ ހަމައަށް އަންނަ ކޮންމެ އެއްޗަކީ އެ ބަނދަރާ ހަމައަށް ނައިސް ވެސް ދިއުމުގެ ފުރުސަތު އޮތް އެއްޗަކަށްވާތީ ސިމާހް ވަނީ އެކަމުގެ ކަންބޮޑުވުންވެސް ފާޅުކުރައްވާފައެވެ.

ސިމާހް ވަނީ މިކަންކަން ބެލޭނެ ނިޒާމްތައް ގާއިމްކުރަން ޖެހޭކަމަށް ވިދާޅުވެ، އެހެން ގައުމުތަކެކޭ އެއްގޮތަށް ދިވެހިރާއްޖޭގައިވެސް މިކަން ވައިގެ މަގުން ބެލެހެއްޓުމުގެ މުހިންމުކަން ފާހަގަކުރައްވާފައެވެ.

ހަބަރު

ކަސްޓަމްސް