ރާއްޖެއަށް ގިނަ އަދަދެއްގެ ސިނގިރޭޓު ވަގަށް އެތެރެކުރި މައްސަލައިގައި މުއައްޒަފަކު ސަސްޕެންޑްކުރިކަމަށް ކަސްޓަމްސްއިން ބުނެފިއެވެ.

ރައްޔިތުންގެ މަޖިލީހުގެ 241 ކޮމިޓީގައި ވާހަކަ ދައްކަވަމުން ކޮމިޝަނާ ޖެނަރަލް އޮފް ކަސްޓަމްސް ޔޫސުފް މާނިއު މުހައްމަދު ވިދާޅުވީ، މި ފަހުން ސިގިރޭޓް ކޮންޓެއިނަރެއްގެ އިތުރުން އެއާ ކާގޯ އިން ވެސް އެތެރެކުރަން އުޅުނު ގިނަ އަދަދެއްގެ ސިނގިރޭޓު ކަސްޓަމްސް އިން އަތުލައިގެން ކަމަށެވެ.

މާނިއު ވިދާޅުވީ، އެތަކެތި އެތެރެކުރި މީހުން ދެނެގަތުމަށްޓަކައި، އޭގެން ބައެއް ތަކެތި މާލެތެރެއަށް ދޫކޮށްލިކަމަށާއި، އެ ތަކެތި ދޫކޮށްލީ ޕޮއިންޓުން އަތުލައިގެންފިއްޔާ ހިއްސާ ފަރާތްތައް ނޭނގޭނެތީކަމަށެވެ. މާލެ ތެރެއަށް ދޫކޮށްލި ތަކެތި ފޮލޯ ކޮށްގެން އިންޓަލިޖެންސާއެކުގައި މަސައްކަތްކޮށްގެން އެކަން ކުރާ ބަޔަކު އިނގިގެން ދިޔަކަމަށް ވެސް މާނިއު ވިދާޅުވިއެވެ.

ސްކޭން މެޝިން ފަންކްޝަން ކުރަން އަދި ސްކޭން ރިޕޯޓް ކިޔަން އެނގޭނީ މަދު މުއައްޒަފުންކަން ފާހަގަކުރައްވަމުން މާނިއު ވަނީ އެ މައްސަލައިގައި ސަސްޕެންޑް ކުރީ ސްކޭން ކުރަން ހުރި ކަސްޓަމްސްގެ އޮފިސަރަކު ކަމަށާއި، އެކަމުގެ ސަބަބުން  މުވައްޒަފުން މަދުވުމުގެ މައްސަލަ ދިމާވެގެން ދިޔަ ކަމަށެވެ.

ދާދިފަހުން، ކަސްޓަމްސްއިން ވަނީ  ވަގަށް އެތެކުރަން އުޅުނު 1.6 މިލިއަން ރުފިޔާގެ ސިގިރޭޓް ކޭސްތަކެއްވެސް އަތުލައިގެންފައެވެ. ހަތަރު ތަނަކުން 173 ކޭސް ސިގިރޭޓް ކަސްޓަމްސްއިން އަތުލައިގެންފައިވާއިރު، އިމްޕޯޓު ޑިއުޓީގެ ގޮތުގައި 5.6 މިލިއަން ދިވެހި ރުފިޔާ ދައްކަން ޖެހޭނެ ކަމަށް އެއިދާރާއިން ބުނެއެވެ.