މިފްކޯގެ ހުސްވެފައިވާ ސީއީއޯ / އެމްޑީ (އިންޓަނޭޝަނަލް) ގެ މަގާމަށް ޝަރުތުހަމަވާ މީހަކު ކުރިމަތިލާފައިނުވާތީ، މިފްކޯއަށް ސީއީއޯއެއް ހޯދަން ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން ކުރި އިއުލާނު ބާތިލްކޮށްފި އެވެ.

އެކަމާއި ގުޅިގެން ޕީސީބީ މިއަދު ކުރި އިއުލާނެއްގައި ބުނީ ސީއީއޯއެއް ހޯދަން މިދިޔަ މަހުގެ 2ގައި ކުރި އިއުލާނު ބާތިލްކުރީ މަގާމަށް ޝަރުތު ހަމަވާ ކެންޑިޑޭޓަކު ކުރިމަތިލާފައި ނުވާތީ ކަމަށެވެ.

މިފްކޯ ހިންގާނެ މީހަކު ހޯދަން ޕީސީބީން ކުރި އިއުލާނުގެ މުއްދަތު އިއްޔެ ހަމަވެފައިވާއިރު، އެމަގާމަށް ބައިނަލްއަގުވާމީ މީހަކަށް ކުރިމަތިލުމުގެ ފުރުސަތުވެސް ވަނީ ހުޅުވާލާފައެވެ.

Advertisement

މި މަގާމަށް މިފްކޯގެ ޑެޕިއުޓީ ސީއީއޯކަން މީގެ ކުރިން ކުރެއްވި އާތިފް ޝަކޫރު ކުރިމަތިލެއްވިކަން ވެސް ފާހަގަކޮށްލަން ޖެހެއެވެ. 

މިފްކޯއަށް ސީއީއޯއެއް ހޯދަން އިއުލާނު ކުރީ ކުރިން އެ މަގާމުގައި ހުންނެވި އަހުމަދު ޝަމާހު ރަޝީދު މިދިޔަ މޭ މަހު އެ މަގާމުން ވަކިކުރުމާއި ގުޅިގެންނެވެ. އެއަށްފަހު ޝަމާހް ވަނީ ފިޝަރީޒް މިނިސްޓްރީގެ ސްޓޭޓް މިނިސްޓަރަކަށް އައްޔަންކޮށްފަ އެވެ.