ރިޔާސީ އިންތިހާބާއި ރައްޔިތުންގެ މަޖިލިސް އިންތިހާބު އެއްފަހަރާ ބާއްވައިފި ނަމަ 130 މިލިޔަން ރުފިޔާ ސަލާމަތް ކުރެވޭނެކަމަށް އިލެކްޝަންސް ކޮމިޝަން (އީސީ) ގެ ރައީސް ފުއާދު ތައުފީގް ވިދާޅުވެއްޖެއެވެ.

ރައްޔިތުންގެ މަޖިލީހުގެ މިނިވަން މުއައްސާތަކުގެ ކޮމިޓީން މިއަދު ބޭއްވި ބައްދަލުވުމުގައި ފުއާދު ވަނީ އިންތިހާބުތައް އެއްފަހަރާ ބާއްވައިފިނަމަ ވާނެ ފައިދާތަކުގެ ތަފްސީލު ހިއްސާކޮށްފައެވެ.

މިގޮތުން، މެމްބަރުން ކުރެއްވި ސުވާލުތަކަށް ޖަވާބު ދެއްވަމުން ފުއާދު ވިދާޅުވީ ދެ އިންތިހާބު އެއް ކުރުމުން 130 މިލިއަން ރުފިޔާ ސަލާމަތްކުރެވޭނެ ކަަމަށް ލަފާކުރެވޭކަމަށާއި، އުނދަގުލަކަށްވާ ނަމަ، ވާނީ ވޯޓު ލާ ދުވަހު ދެ ކަރުދާސްކޮޅު ދިނުން ކަމަށެވެ.

އެއީވެސް އުނދަގޫ ކަމަކަަށް ނުވޭ ކަމަށާއި، ކައުންސިލް އިންތިހާބު ގިނަ ނަންތަކެއް އަންނައިރު، މިކަން ލޯކަލް ކައުންސިލް އިންތިހާބުގައި ތަޖުރިބާކޮށްފައިވާކަމަށް ވެސް ފުއާދު ވިދާޅުވިއެވެ.

ރިޔާސީ އިންތިހާބުގައި ވޯޓް ނުލާ މީހުން މަޖިލިސް އިންތިހާބުގައި ވޯޓްލާނެ ކަމަށާއި، ހަމައެފަދައިން މަޖިލިސް އިންތިހާބުގައި ވޯޓްނުލާ މީހުން ރިޔާސީ އިންތިހާބުގައި ވޯޓްލާނެ ކަން ފާހަގަކުރައްވަމުން ފުއާދު ވިދާޅުވީ، އެ ދެ އިންތިހާބު އެއްކޮށްލައިފިނަމަ  ޓާން އައުޓް 90 ޕަސެންޓަށް ވުރެން މަތިވުމުގެ ފުރުސަތު އެބަ އޮތް ކަމަށެވެ.

ފުއާދު އިތުރަށް ވިދާޅުވީ، އެއް ދަތުރެއްކޮށްފައި ރިޔާސީ އިންތިހާބުގައި ވޯޓުލާން ބޭނުންވާ ކެންޑިޑޭޓާއި މަޖިލިސް މެންބަރަކަށް ބޭނުންވާ ކެންޑިޑޭޓަށް ވޯޓުލެވުމަކީ އެއީ ރައްޔިތުންނަށް ލިބޭ ވަރަށް ބޮޑު ލުޔެއް ކަމަށެވެ.